Skortur á upplýsingum olli óvissu meðal íbúa á Völlum

Nokkrir íbúar í Vallahverfinu upplifðu mikla óvissu vegna upplýsingaskorts á meðan lögregluaðgerðir stóðu yfir í hverfinu á sunnudagskvöld. Fólk hafði áhyggjur af börnum og að vita ekki hvenær það kæmist heim til sín. 

„Það var þannig að lögregla hafði samband við okkur. Við ákváðum síðan að stíga aðeins inn í umræðuna á samfélagsmiðlum þar sem það var alls konar umræða í gangi og hræðsla kannski,“ segir Steinunn Þorsteinsdóttir, upplýsingafulltrúi Hafnarfjarðar.

„Fólk var að fá misvísandi upplýsingar úr alls konar áttum. Okkur fannst mikilvægt að það kæmu upplýsingar frá einhverju opinberu batteríi.“

Af umræðunum á Facebook-síðu íbúa í Vallahverfinu að dæma upplifðu margir ákveðna óvissu í miðjum aðgerðum lögreglu í hverfinu síðastliðið sunnudagskvöld og aðfaranótt mánudags.

Lögregla girti af svæði á Völlunum á sunnudagskvöld vegna manns sem hafði veist að lögregluþjónum og var með ólæti í íbúð sinni. Maðurinn sagðist vera vopnaður skotvopni.

Lögreglumen gengu á milli húsa og báðu fólk um að halda sig innandyra. Fólki, sem var statt utan hverfisins, var meinaður aðgangur. Maðurinn var loks handtekinn á fyrsta tímanum aðfaranótt mánudags og var íbúum þá frjálst að snúa heim.

Íbúar Vallahverfis halda úti hóp á Facebook þar sem umsátur lögreglunnar var skeggrætt. Þar lýstu íbúar meðal annars áhyggjum sínum af skorti á upplýsingum vegna lokunar í hverfinu.

Á síðunni má meðal annars sjá að íbúar höfðu áhyggjur af börnum sem enn væru utandyra auk þess sem fólki fannst erfitt að vera meinaður aðgangur að hverfinu án þess að fá viðunandi skýringar á því.

„Eftir samtal við [lögreglu] þá var ákveðið að setja upplýsingar inn á síðuna sem var kannski ekkert mikið meira en hafði komið fram áður, en maður upplifir það kannski að það rói umræðuna,“ segir Steinunn. Hún segir ávallt góða samvinnu milli bæjarins og viðbragðsaðila.

„Við höfum átt mjög gott samstarf og það erum auðvitað við sem erum þessir aðilar sem eru í beinu sambandi við íbúana, þannig að það var mjög gott að fá þetta símtal frá þeim.“

Hún segir samfélagssíður íbúa góðan vettvang til þess að koma upplýsingum á framfæri og hún segir að vel hafi gengið að koma upplýsingum frá viðbragðsaðilum til íbúa þegar tveir drengir lentu í lífshættu við Reykjadalsstíflu fyrr á árinu.