Bestu vinkonur fá skólastyrk í Hollywood

Vinkonurnar Auður Finnbogadóttir og Silja Rós Ragnarsdóttir hafa undanfarið ár verið að sækja um í leiklistarskóla um allan heim. Þær komust inn í sama skólann, sem er í Hollywood og munu elta drauminn út þann 25. ágúst næstkomandi. Í kvöld munu þær halda brottfarartónleika á Café Rosenberg til styrktar uppihaldi í borg englanna.

„Við komumst báðar inn í The American Academy of Dramatic Arts, sem er elsti academy-leiklistarskólinn í Bandaríkjunum. Þar hafa meðal annars Kim Catrall, Paul Rudd og Grace Kelly lært leiklist. Það voru sjö þúsund manns sem sóttu um skólann í ár en aðeins 130 sem komust inn þannig að við erum alveg í skýjunum. Við fengum líka báðar skólastyrk fyrir áheyrnarprufurnar en það eru aðeins 30 nemendur sem fá hann,“ segir Silja Rós.

Alls eru þær þrjár frá Íslandi sem hefja nám í skólanum í haust. Sú þriðja heitir Berta Andrea Snædal og er um þessar mundir að leika í kvikmynd úti í Bandaríkjunum. Silja býst við að þær verði allar saman í bekk. „Okkur gekk öllum mjög vel í prufunum og það er líklegast að við verðum allar saman í bekk. Við Auður vorum búnar að sækja saman um skóla seinasta árið þannig að það er mjög gaman að hafa komist inn í sama skóla og verða vonandi saman í bekk.“

Það er ekki ódýrt að fara í nám erlendis, sérstaklega í Bandaríkjunum og því hafa stelpurnar verið að safna sér fyrir skólanum lengi. „Ég er í þremur vinnum eins og er. Svo tek ég lán frá LÍN. Skólagjöldin úti eru náttúrulega allt önnur en þau sem við þekkjum hérna heima. Við verðum á heimavist fyrstu önnina en svo í janúar ætlum við að finna okkur íbúð og vonandi náum við að spara okkur einhvern pening með því. Styrkurinn sem við fengum kemur sér líka einstaklega vel,“ segir Silja.

Tónleikarnir hefjast klukkan níu í kvöld og verða eins fyrr segir á Café Rosenberg á Klapparstígnum. Það kostar aðeins 2.000 krónur inn en það verður engi posi á staðnum. Hljómsveitin Four Leaves Left hitar upp fyrir stelpurnar. Jón Birgir Eiríksson mun spila undir á píanó og Grétar Örn Axelsson verður á gítar ásamt Silju. Stelpurnar munu flytja þekkt lög í bland við frumsamið efni.