Vinna að nýju frumvarpi um fiskveiðistjórnun

Sigurður Ingi Jóhannsson, sjávarútvegsráðherra, greindi frá því á Sjávarútvegsdeginum sem fram fór í Hörpu í morgun að unnið væri að gerð nýs frumvarps um fiskveiðistjórnun.

Það feli í sér að gerðir verða samningar við útgerðarfélög um afnot af auðlindinni til ákveðins tíma gegn greiðslu. Þetta kemur fram í frétt á síðu Samtaka atvinnulífsins.

„Gjaldið má ekki vera of hátt svo það hamli fjárfestingu og dragi úr samkeppnishæfni sjávarútvegsfyrirtækja sem eru í harðri samkeppni á alþjóðlegum markaði. En heldur ekki það lágt að fólki finnist sem verið sé að gefa verðmæti,“ sagði Sigurður Ingi.

Sigurður sagði í setningarávarpi sínu sjávarútveg hryggjarstykkið í íslensku efnahagslífi. Það væri hagsmunamál allra, ekki síst þeirra sem búi úti á landi, að sjávarútvegur sé rekinn með arðbærum hætti þar sem það efli byggðir landsins.

Sigurður Ingi talaði því næst um afkomu greinarinnar.

„Afkoma sjávarútvegsfyrirtækja er mér hugleikin og hefur verið um alllangt skeið. Það hefur verið eitt stærsta verkefnið í ráðuneyti sjávarútvegs að semja nýtt fiskveiðistjórnunarfrumvarp og það hefur ekki gengið alveg þrautalaust. Ein ástæða þess er einmitt afkoma sjávarútvegsfyrirtækja.“