Stjórn Sambands ungra sjálfstæðismanna (SUS) hefur ákveðið að veita þeim Pawel Bartoszek og Rannsóknarsetri um Nýsköpun og Hagvöxt, RNH, Frelsisverðlaun Kjartans Gunnarssonar 2014. Verðlaunin verða afhent í dag, föstudag, kl. 17:30 í Valhöll.
Í tilkynningu frá SUS segir að verðlaunin hljóti einstaklingur og lögaðili sem að mati stjórnar sambandsins hafi aukið veg frelsishugsjónarinnar á Íslandi.
Pawel Bartoszek fær verðlaunin fyrir áralanga frelsisbaráttu sína.
„Pistlaskrif Pawels hafa vakið verðskuldaða athygli og honum tekist að hafa mikil og góð áhrif á opinbera umræðu. Óhætt er að segja að frelsisunnendur eigi fáa eins góða málsvara og Pawel. Hann hefur verið óhræddur við að taka slaginn á opinberum vettvangi, sama hvort málstaðurinn teljist vera vinsæll eða óvinsæll, og er traustur málsvari einstaklingsfrelsisins. Pawel, sem er Íslendingur af pólskum uppruna, á einnig þakkir skildar fyrir skrif sín um æskuárin sín í Póllandi. Þar varpar hann á skemmtilegan hátt ljósi á kommúnistastjórn Wojceicj Jaruzelski, síðasta leiðtoga Alþýðuveldisins Póllands,“ segir í tilkynningunni.
Um verðlaun RNH segir í tilkynningunni: „Rannsóknarsetur um nýsköpun og hagvöxt var sett á fót árið 2009. Tilgangur RNH er að rannsaka hvað örvi og hindri nýsköpun og hagvöxt. Í rannsóknum stofnunarinnar er sérstaklega beint sjónum að því, hvernig menn geti með sjálfsprottinni samvinnu, viðskiptum í stað valdboðs, fullnægt þörfum sínum og bætt kjörin.
RNH hefur staðið fyrir fjölmörgum ráðstefnum og erindum, og fengið til landsins marga erlenda fræðimenn og áhugamenn um frelsi til þess að flytja erindi fyrir Íslendinga um gildi frelsisins. Þá sinnir RNH einnig rannsóknastarfi á sviðum sem tengjast sköttum og tekjudreifingu, auðlindanýtingu og umhverfisvernd og nýsköpun og framkvæmdamenn. Auk þess hefur RNH fjallað á öflugan hátt um minningu fórnarlambanna, þeirra sem létust vegna alræðisstefna 20. aldar.“
Verðlaunin hafa verið veitt frá árinu 2007 en meðal fyrri verðlaunahafa eru Andri Snær Magnason, Margrét Pála Ólafsdóttir, Hannes Hólmsteinn Gissurarson, Samtökin '78 og Advice hópurinn.
