Rafbílaleiga fyrir græna ferðamenn

„Þetta er fyrsta rafbílaleigan á landinu,“ segir Aðalsteinn Lárus Skúlason hjá fyrirtækinu ElectricCarrental í Hafnarfirði.

Aðalsteinn er aðeins 21 árs gamall og segir rafbílaleiguna því verða fyrstu skref sín í fyrirtækjarekstri. Fyrsti bíllinn verði keyptur eftir næstu helgi. Það verði bíll sem dregur um 130 kílómetra á 80 prósent hleðslu sem ná megi á tuttugu mínútum á hraðhleðslustöðvum. Síðar sé ætlunin að huga að langdrægari tegundum.

„Mest erum við að höfða til vistvænna náttúruunnenda og held að við eigum sterkan leik með því að vera með alveg grænt verkefni,“ segir Aðalsteinn.

Að sögn Aðalsteins er ætlunin að kynna rafbílaleiguna í gegn um Google-leitarvélina. Þar verði spjótunum sérstaklega beint að Bandaríkjunum og Spáni þaðan sem margir ferðamenn komi til Íslands.