Pollapönkstuð í sunnudagaskóla

Hljómsveitin Pollapönk með sjálfan æskulýðsfulltrúa kirkjunnar í broddi fylkingar skemmtir á fjölskyldumessu í Vídalínskirkju í Garðabæ næstkomandi sunnudag.

Það voru hæg heimatökin hjá nýja æskulýðsfulltrúanum, Heiðari Erni Kristjánssyni, að hóa þeim saman enda sjálfur liðsmaður sveitarinnar ásamt bræðrunum Haraldi Frey og Arnari Gíslasonum og Guðna Finnssyni.

Heiðar Örn hefur sunnudagaskólann á sinni könnu, en hann fellur einu sinni í mánuði inn í fjölskyldumessu, „Á sunnudaginn verður árleg Stjörnumessa þar sem iðkendum og þjálfurum hjá Stjörnunni er boðið að koma og gera einhverjar kúnstir og vera með húllumhæ. Pollapönkarar leggja svo sitt af mörkum með spili, söng og skemmtilegheitum,“ segir Heiðar Örn.

Hann telur ekki loku fyrir það skotið að þeir félagar verði í FH-treyjunum sínum innan undir Pollapönksgöllunum, enda þrír þeirra gallharðir FH-ingar.

„Séra Jóna Hrönn Bolladóttir messar, en ekki er ólíklegt að hún fái líka annað hlutverk í pönkmessunni. Kannski bið ég hana að vera rótara, eða ég set hana á takkana, enda hef ég góða reynslu af henni sem hljóðmanni.“