Gerir ekki mikið í bransanum nema vera vel tengdur

„Ég er í námi að læra fótboltastjórnun og er einnig að kynnast fólki og stækka tengslanetið. Maður er að læra allt um leikinn sem maður kann ekki og veit ekki hvernig virkar. Fótboltinn er svo fljótur að breytast að maður verður að uppfæra sig,“ segir Grétar Rafn Steinsson, fyrrverandi atvinnu- og landsliðsmaður í fótbolta, sem lagt hefur skóna á hilluna vegna þrálátra meiðsla.

Grétar Rafn er nú á fullu að undirbúa sig fyrir lífið eftir fótboltaferilinn þótt hann stefni að starfi innan fótboltans. Hann nemur fótboltastjórnun við Johan Cruyff-stofnunina þar sem kenndar eru viðskiptahliðar boltans.

„Þetta tengist meira viðskiptum en fótbolta. Með fullri virðingu fyrir okkur fótboltamönnum þá erum við margir ekkert búnir með mikið háskólanám. En sem betur fer kláraði ég fjölbraut áður en ég fór út og er því með einhvern grunn,“ segir Grétar en hvað er það nákvæmlega sem menn læra þarna?

„Það er mikið farið út í áætlanir, taktík og greiningar. Einnig fer þetta yfir í markaðsfræði og vörumerkin. Þetta eru bara alls konar þættir sem snúa að viðskiptahluta fótboltafélaga – eitthvað sem ég þekki ekki. Ég þarf að læra þetta og hef mjög gaman af. Svo sjáum við bara til hversu langt þetta fer með mig.“

Grétar er einnig á miklu flakki um Evrópu og fer á fótboltaleiki víðs vegar um álfuna. Það gerir hann til að styrkja tengslanetið ef ske kynni að hann myndi til dæmis leggja fyrir sig umboðsmennsku. Hann er nú þegar farinn af stað með skrifstofu sem hann rekur erlendis.

Framtíðin óráðin

„Þú gerir ekkert mikið í þessum bransa nema vera vel tengdur og vita hvað er að gerast. Ég vinn í gegnum erlendan markað og er með skrifstofu hérna úti. Framtíðin er samt óráðin. Ég er með umboðsréttindi en maður þarf bara alltaf að vera tilbúinn að læra og uppfæra sig,“ segir Grétar en ein ástæða þess að hann sækir alla þessa velli og ferðast svona mikið er til að minna á sig.

„Þú ert kannski eitthvað þekktur þegar þú ert að spila en þegar þú hættir ertu bara einn af hundruðum þúsunda fyrrverandi fótboltamanna. Maður er fljótur að gleymast. Því þarf að leggja á sig marga tíma á dag til að gera eitthvað því heimurinn getur verið harður,“ segir Grétar Rafn.

Mynd af Grétari Rafni vakti mikla athygli hér heima um síðustu helgi þar sem hann sást á leiðinni á leik Vitesse Arnhem og Ajax með tveimur risum í bransanum: Louis van Gaal, landsliðsþjálfara Hollands, og Robin van Persie, framherja Manchester United.

„Ég þekki Van Gaal náttúrlega mjög vel eftir daga mína hjá AZ. Hann skutlaði okkur á völlinn og við áttum bara fínasta dag saman. Ég er búinn að vera í heimsókn hjá hollenska sambandinu þannig að þetta hentaði ágætlega. Maður þarf að reyna að fá sem mest út úr svona dögum.“