Metfjöldi mun yfirfylla skólana í haust

Metfjöldi barna streymir í grunnskóla landsins haustið 2015 án þess að brugðist hafi verið við fjölguninni að fullu. Aldrei hafa fleiri börn fæðst á Íslandi en árið 2009 en þá fæddust 5.026 börn vítt og breitt um landið. Þau hefja grunnskólanám þarnæsta haust.

Samkvæmt spám munu 600 fleiri stunda nám við grunnskóla Reykjavíkur árið 2015 en 2013.

Aðeins tveir almennir grunnskólar í borginni eru á teikniborðinu. Fyrirhugað er að hefja viðbyggingu við Vesturbæjarskóla seinni hluta þessa árs. Þá verður Dalskóli í Úlfarsárdal byggður. Börn þar hafa stundað nám í lausum stofum frá stofnun Dalskóla 2010. Áætlað er að hefja byggingu skólans síðla árs 2015.

Lausar stofur eiga að leysa vandann

Oddný Sturludóttir, formaður skóla- og frístundaráðs Reykjavíkurborgar, segir að brugðist verði við vandanum með fjölgun lausra stofa þar sem það á við.

Sé gert ráð fyrir 20 börnum í bekk þarf að fjölga kennslustofum í Reykjavík umtalsvert áður en skólaárið 2015 hefst.

Fjölgun barna í grunnskólum borgarinnar mun hafa áhrif á fleira en kennslustofur. Finna verður lausnir til að mæta auknu álagi í mötuneytum skólanna en mörg mötuneyti eru nú þegar tví- og þrísetin yfir hádegið.

Frístundaheimili borgarinnar munu eins finna fyrir aukningunni. Nú eru börn á biðlistum að komast á frístundaheimilin. Frístundaheimili Rimaskóla er í lausum stofum og frístundaheimilið Frostheimar í Vesturbænum notast við lausar stofur til viðbótar við húsnæði sitt. Áætlað er að byggja nýtt frístundaheimili við Vogaskóla.

Móðir vill að börnin fái sambærilega þjónustu

Svanhildur Eva Stefánsdóttir er móðir barns sem hefur skólagöngu haustið 2015.

Svanhildur segist ósátt við að ekki hafi verið brugðist við fjölguninni fyrr enda hefur stærð árgangsins legið ljós fyrir í nokkur ár.

Að sögn Svanhildar er skortur á húsnæði þó aðeins einn hluti vandans. „Eru nægir kennarar til að taka við þessum fjölda?“

Sonur Svanhildar er í lausri stofu í leikskóla sínum. „Ég myndi vilja sjá einhverjar áætlanir þannig að barnið mitt sem er fætt árið 2009 fái sambærilega þjónustu og barn sem er fætt 2005. Ég vil að borgin sé viðbúin og það sé ekki allt á síðustu stundu,“ segir Svanhildur