Uppgötvuð af undirmanni Ridley Scott

„Við gerðum myndband í samstarfi við Sagafilm og leikstjórann Sigurgeir Þórðarson. Það heppnaðist vel og hefur fengið góðar viðtökur erlendis, sérstaklega í Norður-Ameríku. Það virðist hafa dottið í réttar hendur og poppaði upp hjá manni sem er að vinna fyrir Ridley Scott. Hann fann lagið, var mjög ánægður og hafði samband við okkur,“ segir tónlistarkonan Elín Ólafsdóttir í hljómsveitinni Bellstop.

Lagið Trouble, af plötunni Karma, hljómar í stiklu fyrir bandarísku sjónvarpsþættina The Originals sem sýndir eru á CW Network. Óvíst er hvort lagið muni hljóma í þáttaröðinni sjálfri.

„Stiklan er fyrir aðra þáttaröð en fyrsta serían er búin að fá ofboðslega góða dóma. Þetta eru háklassaþættir og við erum mjög ánægð með að taka þátt í þessu.“ Elín telur þetta getað opnað dyr í tónlistarbransanum erlendis.

„Við höfum fengið mikil viðbrögð við laginu. Við erum að fara á tónleikaferðalag í Kanada á árinu og því vinsælla sem lagið verður því stærri getur ferðalagið orðið.“

Elín stofnaði hljómsveitina með eiginmanni sínum, Rúnari Sigurbjörnssyni, árið 2006 en þá hét hún Heima. 

„Við bjuggum úti í Kína í fimm ár, gáfum þar út plötu og ferðuðumst út um allt. Núna er hljómsveitin orðin stærri. Áður en platan okkar kom út í fyrra ákváðum við að breyta um nafn. Bellstop er alþjóðlegra nafn og það gengur betur að auglýsa okkur á netinu því nafnið er óalgengt.“