Jordan Belfort fékk einkakennslu í Kópavogi

Ungir tennisiðkendur ráku upp stór augu í Tennishöllinni í Kópavogi þegar Jordan Belfort var þangað mættur með skýrt markmið. Að bæta sig í tennis.

„Þrátt fyrir allt þá virkar hann bara vingjarnlegur. Hann spjallaði við krakkana sem voru hérna á æfingu og hafði ekkert á móti myndatökum,“ segir tennisþjálfarinn Milan Kosicky sem tók Belfort í einkatíma síðdegis. Hann segir Belfort hafa verið nokkuð sleipan spilara.

„Hann hefur spilað við góða leikmenn og lét mig alveg hafa fyrir hlutunum,“ segir Milan sem er Slóvaki sem starfað hefur sem tennisþjálfari hér á landi undanfarin ár. Hann segir ekki hafa verið neitt mál að taka Belfort í tíma enda hafi hann áður þjálfað ytra á stöðum sem sóttir voru af stjörnunum. Belfort hafi verið smá tíma að venjast undirlaginu í Tennishöllinni en fljótlega náð tökum á því. Hafi hann verið sáttur við aðstæður í Kópavoginum.

Belfort, sem öðlast hefur heimsfrægð í kjölfar kvikmyndinnar Wolf of Wall Street, ferðast í dag um heiminn, flytur fyrirlestra og kynnir eigin sölutækni sem hann hefur einkaleyfi á. Hann heldur fyrirlestur í Háskólabíó þann 6. maí en hátt miðaverð hefur vakið athygli. Miðar í sæti framarlega í bíóinu kosta 50 þúsund krónur en aftar 40 þúsund krónur.

Tenniskappinn Magnús Gunnarsson, sem einnig starfar sem þjálfari í Tennishöllinni í Kópavogi, nýtti tækifærið og fékk mynd af sér og Belfort. Hann tekur undir orð Milan að Belfort hafi verið nokkuð liðtækur og tækni hans sérstaklega góð.

Belfort hafi spjallað mikið við nærstadda og meðal annars sagst myndu spila við Svisslendinginn Roger Federer og Spánverjann Rafael Nadal í næsta mánuði.