„Ræna fólk í björtu á kaldrifjaðan og ákveðinn hátt“

„Mynd Martin Scorsese sýndi vel siðleysi og svindilhætti prangarans,“ segir Stefán Ólafsson, prófessor í félagsfræði við Háskóla Íslands, í bloggfærslu sinni og gagnrýnir komu Jordans Belford til Íslands en hann mun halda sölufyrirlestur þann 6. maí í Háskólabíó.

Jordan Belfort, einnig þekktur sem úlfurinn á Wall Street, en hann varð heimsfrægur þegar mynd Martin Scorsese, Wolf of wall street, kom út á síðasta ári.

Miðar á fyrirlesturinn kosta á bilinu 39.900 og 49.900 krónur.

„Sölutæknin sem um ræðir hefur fengið söluvænt heiti (“Straight Line Persuasion”!), til að gefa manninum yfirbragð um fagmennsku,“ ritar Stefán.

Stefán segir að aðferð Belforts snúist ekki um neitt annað en að plata fólk og svíkja með lygum.

„Koma sparifé fólks í vasa miðlarans. Ræna fólk í björtu á kaldrifjaðan og ákveðinn hátt. Fyrir það hlaut hann á endanum dóm og háar sektir sem hann hefur ekki greitt.“

Stefán segir það dapurlegast hvað þetta segi um er siðferðisstigið í íslensku viðskiptalífi og samfélagi.

„Við erum nýkomin út úr braskbólu sem setti þjóðarbúið á hliðina og einkenndist af taumlausri græðgi, braski og skuldasöfnun – og vafasömum viðskiptaháttum.“

Félagsfræðingurinn segir að næsta stopp sé því lygafyrirlestur hjá siðlausum svindlara.

Belfort var dæmdur fyrir brot sín til þess að greiða viðskiptavinum sínum 110,4 milljónir dollara eða jafnvirði 12 og hálfs milljarða íslenskra króna.