Gagnrýnir hve hratt núverandi ríkisstjórn afsalar ríkinu tekjustofnum

Steingrímur J. Sigfússon, fyrrverandi fjármálaráðherra, gagnrýnir hvað núverandi ríkisstjórn hefur farið bratt í að afsala ríkinu tekjustofnum. Hann óttast að stjórnvöld missi fram af sér beislið þegar betur fari að ára í stað þess að vinna á miklum skuldavanda ríkissjóðs.

Steingrímur og Höskuldur Þórhallsson, þingmaður Framsóknarflokksins og formaður umhverfis- og samgöngunefndar, voru gestir Sigurjóns M. Egilssonar í þættinum Á Sprengisandi á Bylgjunni í morgun.

Steingrímur bendir á að frá því að núverandi ríkisstjórn tók við hafi stjórnvöld lækkað veiðigjaldið, ákveðið að framlengja ekki auðleggðarskattinn og lækkað tekjuskattinn. Nú er síðan stefnt að því að afnema almenn vörugjöld og er talið að skattkerfisbreytingar næsta árs muni lækka tekjur ríkissjóðs um sex milljarða.

„Hlutirnir eru að lagast hjá okkur hægt og bítandi en sá viðsnúningur varð allur um mitt síðasta kjörtímabil. Þetta eru bara staðreyndir sem Hagstofan birtir okkur með sínum tölum,“ sagði Steingrímur J. Sigfússon og bætti við að hann gleddist á hverjum degi sem ástand efnahagsmála væri að lagast.

„En ég hef líka mælt ákveðin varnaðarorð. Nú megum við ekki missa fram af okkur beislið. Sagan segir okkur það að okkur Íslendingum hefur alltaf gengið verr að vera ábyrg og öguð þegar við höldum að það sé komið góðæri. Þá hafa hlutirnir yfirleitt farið úrskeiðis.“

Íslendingum hafi yfirleitt gengið betur að glíma við erfiðleikana en góðærin. Staðan nú sé mjög brothætt vegna gífurlegra skulda ríkisins og annarra grunnstoða samfélagsins.

Höskuldur sagðist telja að stjórnvöld væru að stíga varlega til jarðar. Vissulega hefði náðst árangur í ríkisfjármálum á síðasta kjörtímabili.

„Að sjálfsögðu erum við á varðbergi og við fylgjumst sérstaklega með einkaneyslunni. Ég held að það sé g´riðarlega mikilvægt en það sem skiptir máli er að við viljum auka hér fjárfestingu í landinu. Það er verið að skapa skilyrði þess og við erum að sjá mörg jákvæð teikn í þá veru. Okkur mun takast að snúa við innflutningsvandanum og flytja meira út en þar hefur krónan hjálpað okkur gríðarlega,“ sagði Höskuldur Þórhallsson.