Bruninn í Brekkubæjarskóla: Blysið yfir þúsund gráðu heitt

Ekkert eftirlit er með því hér á landi hvort útrunnin neyðarblys eru endurnýjuð. Níu ára drengur stórslasaðist á dögunum eftir að hafa fundið blys á víðavangi á Akranesi.

Hann hlaut þriðja stigs brunasár og enn er hlúð að sárum hans á Barnaspítala Hringsins.

Atvikið átti sér stað þann 22. september síðastliðinn. Drengurinn og tveir vinir hans fundu útrunnið neyðarblys í grennd við Brekkubæjarskóla á Akranesi. Það fór síðan svo að kviknaði á blysinu í upphafi kennslustundar.

Drengurinn brenndist alvarlega á kviði og lærum. Nemendum var boðin áfallahjálp en drengurinn var fluttur á gjörgæsludeild og þaðan á Barnaspítala Hringsins þar sem hann er nú.

Foreldrar drengsins gera ráð fyrir að dvelja á Barnaspítalanum næstu vikurnar.

Neyðarblysið sem vinirnir fundu var af svipaðri tegund og þau sem finna má í skipum og gúmmíbátum.

Blysin eru hönnuð til að nota í erfiðum aðstæðum og því afar einfalt að kveikja á þeim.

Einu sinnu á ári gera skipaskoðunarmenn úttekt á skipaflota landsins. Þar eru neyðarblys skoðuð sérstaklega. Engin eftirfylgni er til staðar, reynist blysin útrunnin. Hægt er að skila ónýtum blysum í Sorpu þar sem Landhelgisgæslan sér um förgun þeirra.

„Það er ábyrgðarhluti að kasta svona blysum frá sér,“ segir Jónas Ottósson, lögreglufulltrúi á Akranesi.

„Þau eru stórhættuleg í höndum þeirra sem ekki kunna að fara með þau. Það er mikill hiti og þau brenna lengi.“