Rannsókn vegna stækkunar fjármögnuð með veggjöldum

„Á árunum 2007 til 2009 voru gerðar rannsóknir sem voru undirbúningur fyrir tvöföldun Hvalfjarðarganga,“ segir Gísli Gíslason, stjórnarformaður Spalar sem sér um rekstur gangnanna.

„Það var gert í samkomulagi við Vegagerðina og gögnin úr þeirri vinnu voru afhent Vegagerðinni og ríkinu,“ segir Gísli en rannsóknin var hluti af öryggismálum Hvalfjarðargangna.

Heildarkostnaður rannsóknarinnar nam 113 milljónum króna. Gísli segir að veggjöldin hafi fjármagnað rannsóknina. Rannsóknin fólst meðal annars í því að bora upp í bergið, skoða jarðveginn og reglugerðir og úttekt á kröfum sem nú eru gerðar til jarðgangna.

Um það hvort að slíkar rannsóknir séu í samræmi við upphaflegan samning Spalar við ríkið um rekstur Hvalfjarðarganga svarar Gísli því til að árið 2007 hafi Spölur gert samkomulag við Vegagerðina um að Spölur færi í grunnrannsóknir á mögulegum nýjum göngum eða stækkun þeirra.

Á þeim tíma hafi umferðarferðarþungi í gegnum göngin verið þannig að talið var nauðsynlegt að fara í að kanna með stækkun þeirra. Auk þess hafi öryggiskröfur í jarðgöngum verið hertar frá því árið 1995 þegar upphaflegur samningur var undirritaður.

Verkefni Spalar sé að reka göngin og sjá til þess að þau uppfylli  þær kröfur sem gerðar eru um öryggi. Fyrir utan þær 113 miljónir sem farið hafa í rannsóknir vegna stækkunar gangnanna hafi Spölur fjárfest í öryggisbúnaði í göngunum fyrir um 300 milljónir . Varla sé hægt að álása Spöl fyrir að draga lappirnar í því að tryggja öryggi vegfarenda.

Stækkun kostar átta til níu milljarða

Gísli segir að kostnaður við stækkun gangnanna sé á bilinu átta til níu milljarðar án virðisaukaskatts og rannsóknarvinnan hafi aðeins verið undirbúningur á því verkefni.



Hann segir það margrætt að tvöföldun gangnanna sé langbesta lausnin í öryggismálum á þessum kafla þjóðvegarins. „Það er ekki spurning um hvort göngin verði stækkuð heldur hvenær,“ segir Gísli. „Umferð í gegnum göngin dróst saman árið 2008 en nú er það að snúast við.“

Stjórn Spalar taki ekki ákvörðun um framkvæmdina né með hvaða hætti hún verði fjármögnuð eða greidd. „Ég vildi gjarnan keyra þarna frítt, það er ekki það, en það er augljóst að það þarf að fjalla um málið og fara yfir það með faglegum hætti.“