Moyes: Áttum ekki skilið að lenda undir

„Við spiluðum mjög vel. Það eina sem við getum gert er að spila vel og reyna að nýta færin sem við sköpum,“ sagði David Moyes eftir 2-1 tap Manchester United gegn Tottenham í ensku úrvalsdeildinni í knattspyrnu í dag.

Skotinn mátti horfa upp á United tapa enn einum leiknum á heimavelli í vetur. Ljóst er að Old Trafford er ekki lengur það vígi sem það var. Moyes var þrátt fyrir allt ánægður með sína menn sem fengu færin til að jafna metin seint í leiknum. Allt kom fyrir ekki.

„Við áttum ekki skilið að lenda undir,“ sagði Moyes sem var ósáttur við spurningu blaðamanns hvað honum fyndist um dýfur Danny Welbeck og Adnan Januzaj í leiknum. Fannst honum hans menn sviknir um vítaspyrnu í leiknum og fullyrti að gula spjaldið sem Januzaj fékk hefði verið rangur dómur.

Aðspurður hvort United ætti enn möguleika á titlinum eða þyrfti að endurskoða markmið sín og stefna á eitt af fjórum efstu sætunum sagði Moyes:

„Við reynum að vinna næsta leik. Annað getum við ekki. Við vildum vera hærra í deildinni en sjáum hvað setur eftir næsta leik.“

Félagaskiptaglugginn er opinn út mánuðinn. Moyes reiknar ekki með því að nýta gluggann til að styrkja hópinn sinn.

„Ekki eftir frammistöðuna í dag. Leikmennirnir spiluðu mjög vel.“