Þjálfari Króata ósáttur við blaðamann Vísis

Niko Kovac, þjálfari karlalandsliðs Króatíu, var allt annað en sáttur við spurningu blaðamanns Vísis á fundi með blaðamönnum í Zagreb í dag.

Undirritaður spurði Kovac hvort hann myndi refsa leikmönnunum átta sem fengu sér vel í glas á hóteli liðsins eftir markalausa jafnteflið á föstudagskvöldið. Vísir fjallaði um málið fyrr í dag.

„Trúir þú að þetta sé satt?“ spurði Kovac undirritaðan sem svaraði því til að  hann vissi að sagan væri sönn.

„Ef þú trúir því virkilega að sagan sé sönn þá þakka ég fyrir gestrisnina,“ sagði Kovac kaldhæðinn.

„Ég veit fyrir víst að sagan er ekki sönn. Ég hélt að þú værir herramaður úr norðri. Nú veit ég að það er ekki satt.“

Vísir ítrekar að vefurinn stendur algjörlega við fyrri frétt um málið.