Fellaini grunaður um að hrækja á Zabaleta

Enska knattspyrnusambandið skoðar nú hvort að ástæða sé til að dæma Marouane Fellaini, leikmann Manchester United, í leikbann.

Fellaini slapp með áminningu þegar hann virtist gefa Pablo Zabaleta, leikmann Manchester City, olnbogaskot í leik liðanna á þriðjudagskvöld.

Nú hefur komið fram myndefni sem þykir sýna að Fellaini hafi hrækt að Argentínumanninum er hann lá í grasinu.

Enska sambandið er nú með myndefnið til skoðunar en samkvæmt enskum fjölmiðlum mun Manchester City ekki leggja fram kvörtun vegna málsins.

Verði Fellaini fundinn sekur á hann yfir höfði sér þriggja leikja bann.