Hefur hitt álf sem var að hitta manneskju í fyrsta skipti: „Mjög sérstök tilfinning“

„Hvað eru álfar og hvað er mannfólk? við erum bara öll verur sem búum hérna saman á þessari jörðu,“ segir Ragnhildur Jónsdóttir í þættinum Í bítið á Bylgjunni í morgun.

Ragnhildur rekur ásamt eiginmanni sínum Álfagarðinn, miðstöð álfa og huldufólks, í Hafnarfirði. Álfagarðurinn er staðsettur í Hellisgerði en þar er jafnframt friðsamt samfélag álfa, huldufólks og dverga, og hefur verið lengi.

„Það eru til margar tegundir af álfum, margar af dvergum og nokkrar tegundir af huldufólki. Sjálf man ég ekki eftir tilverunni neitt öðruvísi en að hafa verið í samskiptum við þessar verur.“

Ragnhildur segir að heilmikill munur sé á álfum og huldufólki.

Ekki með þessa græðgi og eyðingarhvöt

„Huldufólk er mjög líkt okkur í útliti og svona í sér á margan hátt en ekki með þessa græðgi og eyðingarhvöt eins og við. Álfar geta verið af mörgum tegundum en algengustu tegundirnar ná okkur sirka upp í mitti og í útliti eru þeir mjög svipaðir okkur, bara aðeins minni. Það eru til allskonar álfar, grænir með uppmjó eyru, litlir brúnir sem líta út eins og tröll og mjög stórir álfar sem búa upp í fjöllum.“

Ragnhildur segir að flestir álfar séu góðir en auðvitað eru ákveðnar undantekningar.

„Sem betur fer eru dökkir álfar sjaldgæfir, bara eins og hjá okkur mannfólkinu. Flestir álfar sjá okkur mannfólkið alltaf en ég hef hitt álf sem var að hitta manneskju í fyrsta skipti og það er mjög sérstök tilfinning.“

Ragnhildur er nýkomin heim frá Bandaríkjunum þar sem hún var beðin um að koma og hjálpa til við að koma aftur á tengslum milli álfa og dverga og mannfólks í Central Park í New York. Með í för voru þó nokkrir álfar og huldufólk.

Vísindamenn og fræðimenn hafa margir hverjir gagnrýnt þá sem trúa á álfa en hvað segir Ragnhildur um slíka gagnrýni; „Það neita þessu ekki allir vísindamenn. Ég fæ hópa af vísindamönnum, sálfræðingum og allskyns fólki til mín í álfagarðinn sem eru kannski ekkert endilega að tala um þetta upphátt.“

Ragnhildur segist einnig hafa séð geimverur á sinni lífsleið.