Kröfu Ingimars í vændiskaupamáli hafnað

Héraðsdómur Reykjavíkur úrskurðaði í gær að þinghald verði lokað í 7 vændiskaupamálum en ritstjóri Reykjavíkur vikublaðs, Ingimar Karl Helgason, fór fram á að þinghald yrði opið. Mbl.is greinir frá.

Héraðsdómur hafði áður vísað kröfu Ingimars frá dómi en Hæstiréttur úrskurðaði fyrr í mánuðinum að dómnum bæri að taka kröfuna fyrir. Áður höfðu bæði dómstig komist að þeirri niðurstöðu að þinghald skyldi vera lokað í máli 40 einstaklinga sem ákærðir hafa verið fyrir vændiskaup eða tilraun til vændiskaupa, en ríkissaksóknari fór fram á að þinghald yrði opið.

Ingimar Karl krafðist þess svo sem blaðamaður og ritstjóri að héraðsdómur úrskurðaði um ákvörðun sína á grundvelli laga um meðferð sakamála, en aðgang að lokuðu þinghaldi hafa aðeins þeir sem tengjast málum beint.