Tónlistarnemendum í Reykjavík mismunað í kjölfar verkfalls

Gunnar Guðbjörnsson, skólastjóri Söngskóla Sigurðar Demetz, segir að Reykjavíkurborg muni ekki bæta öllum tónlistarnemendum upp þann kennslutíma sem þeir misstu í nýafstöðnu verkfalli tónlistarkennara. Þannig muni borgin hvorki bæta nemendum á mið-og framhaldsstig í söngnámi tapaðan kennslutíma né framhaldsnemendum í tónlist.

Gunnar segir þetta gera það að verkum  að nemendum sé í raun mismunað; sumir fá kennslustundir bættar á meðan ekki er hægt að bæta öðrum neitt upp vegna fjárskorts. Ástæðan er sú að Reykjavíkurborg lítur svo á að ríkið hafi tekið yfir tónlistarnám á framhaldsstigi, og mið-og framhaldsstig í söng, með samkomulagi ríkis og sveitarfélaga um tónlistarkennslu frá 2011.

Í samkomulaginu er kveðið á um nokkur hundruð milljóna króna fjárframlag ríkissjóðs í jöfnunarsjóð sem á að renna til framhaldsskólastigs í tónlistarskólunum. Því framlagi skiptir borgin á milli tónlistarskólanna í Reykjavík en Gunnar segir að greiðslan dugi ekki til að borga kennurunum laun.

„Við höfum verið að taka úr skólagjaldasjóðnum til að geta greitt kennurum laun. Framlagið sem kemur í gegnum jöfnunarsjóðinn sem ríkið greiðir í dugir núna fyrir um 75% af kostnaðinum við kennsluna. Nú þegar sveitarfélögin hafa samið við tónlistarkennara um launahækkanir mun fjárhagsstaða skólans í raun bara versna enn frekar. Þegar  nýir kjarasamningar taka gildi mun greiðslan sem kemur frá jöfnunarsjóði standa straum af um 65% af kostnaðinum því upphæðin sem rennur til okkar hækkar ekkert,“ segir Gunnar.

Hann segir því allt stefna í að skólinn muni ekki geta greitt kennurum laun þegar nýir kjarasamningar taka gildi. Skólinn hafi einfaldlega ekki fjármuni til þess.

Aðspurður hvort þetta strandi á pólitíkinni segist Gunnar vona að svo sé ekki þó ýmislegt bendi til þess.

„Þetta mál kom auðvitað upp í fyrstu stjórnartíð núverandi meirihluta í borginni og samkomulagið við ríkið var gert vegna mikils niðurskurðar sem fyrirhugaður var í tónlistarkennslu í Reykjavík. Nú eru sömu flokkar við völd og ekkert stefnir í að þetta muni breytast.“

Gunnar segir það jafnframt vera undarlega stöðu að hann sem launagreiðandi hafi ekki átt fulltrúa í þeim samningaviðræðum sem leiddu til nýrra kjarasamninga tónlistarkennara. Að  sama skapi sé undarlegt að ríkið hafi ekki átt fulltrúa í samninganefndinni ef það hefur tekið yfir mið-og framhaldsnám í söng og framhaldsnám í tónlist, líkt og Reykjavíkurborg heldur fram.