Geir Jón segir Búsáhaldaskýrsluna aldrei hugsaða til húslestrar

Skýrsla sem Geir Jón Þórisson fyrrverandi yfirlögregluþjónn tók saman um Búsáhaldabyltinguna hefur verið mjög til umfjöllunar uppá síðkastið. Vísir náði tali af honum nú í dag en hann er nýkominn heim en hann var, ásamt með góðum hópi Eyjamanna, í skemmtisiglingu á Miðjarðarhafinu. Þriggja vikna ferð. „Já, ég slökkti á símanum á meðan. Var rólegur og naut mín vel meðan landið logaði vegna mín. Ég kom heim í gærkvöldi,“ segir Geir Jón. „Það verður alltaf allt vitlaust þegar ég er erlendis. Síðast þegar ég fór út, árið 2008, þá hrundi bankakerfið.“

Spurður út í skýrsluna sem hann skrifaði og hefur verið mjög til umfjöllunar undanfarna daga og vikur segir Geir Jón það furðu sæta að fólk vilji ekkert kannast við sínar stjórnmálaskoðanir, sem það hafi þó ekki farið í felur með. „Svo þegar lögreglan fjallar um það heitir það njósnir!? En, ég mun ekkert frekar fara í það. Skýrslan er eign lögreglustjórans, nú er búið að afhenda hana með eins klaufalegum hætti og hægt var, skýrsla sem átti aldrei að fara úr húsi. Henni átti að halda saman á einum stað. Aldrei áður í sögu lögreglunnar hefur annað eins gerst og ef lögreglan heldur ekki utan um slíka stóratburði, veit ég ekki hvenær á að gera það? Svo geta menn gagnrýnt textann, og ásakað mig um hitt og þetta, það verður bara að hafa það. Þarna voru lögreglumenn sem sögðu sínar skoðanir og skýrslan var aldrei ætluð til húslestrar.“

Geir Jón segist að öðru leyti hafa tekið þá ákvörðun að ræða þessa skýrslu ekki. „Sem mér var gert af lögreglustjóra að skrifa. Ég vil þó gjarnan að það komi fram að það er rangt að ég hafi kynnt þessa skýrslu í stjórnmálaskóla Sjálfstæðisflokksins. Það er mikill útúrsnúningur. Ég var beðinn um að segja af reynslu minni sem lögregluþjónn af mótmælum á hádegisverðarfundi í Valhöll. Fundurinn var haustið eftir að ég hafði boðið mig fram sem varaformaður Sjálfstæðisflokksins. Skýrsluna afhenti ég 1. júlí 2012. Hún er eign lögreglustjóra og ég hafði hana aldrei undir höndum,“ segir Geir Jón og ítrekar að það sé af og frá að hann hafi vitnað í skýrsluna við þetta tækifæri. „Það hefði ég aldrei gert. Og lögreglustjóri hvatti þá sem vildu meina að svo hefði verið, að kæra, ef ég hefði brotið trúnað með að vitna í skýrsluna. Það gerði ég aldrei.“

Geir Jón segir þetta alveg skýrt. Og hans stjórnmálaskoðanir hafi aldrei legið fyrir meðan hann starfaði sem lögreglumaður, enda hafi hann átt gott samstarf við fólk úr öllum flokkum. Geir Jón er nú á eftirlaunum og segist njóta lífsins úti í Vestmannaeyjum.