Hvetja vegfarendur til að fara varlega

Átta vegfarendur slösuðust í sex umferðarslysum á höfuðborgarsvæðinu í síðustu viku. Lögreglan segir ástæðu til að minna ökumenn á að aka varlega og hafa jafnan gott bil á milli ökutækja.

Kona datt af reiðhjóli í Skeifunni á mánudaginn í síðustu viku. Hún var flutt á slysadeild með sjúkrabíl.

Harður árekstur varð á gatnamótum Miklubrautar og Háaleitisbrautar á miðvikudaginn. Ökumenn beggja bílanna voru fluttir á slysadeild vegna minniháttar meiðsla.

Þrjú umferðarslys voru tilkynnt til lögreglu á fimmtudaginn. Árekstur tveggja bíla varð á gatnamótum Hringbrautar og Njarðargötu, en einn bílinn rakst í þann þriðja í árekstrinum. Ökumaður eins bílsins var fluttur á slysadeild vegna meiðsla á fæti.

Þriggja bíla aftanákeyrsla varð á Bústaðavegi við Veðurstofu Íslands. Þá varð umferðarslys í Bæjarhrauni. Þar var bíl ekið í veg fyrir aðra og var einn fluttur á slysadeild til skoðunar.

Aftanákeyrsla varð á gatnamótum Dalvegs og Nýbýlavegs á föstudaginn. Farþegi og ökumaður í fremri bílnum meiddust á hálsi og voru fluttir á slysadeild.

„Ástæða er til að minna ökumenn að aka varlega og hafa jafnan gott bil á milli ökutækja svo stöðva megi á a.m.k. þriðjungi þeirrar vegalengdar sem er auð framundan. Þá þurfa ökumenn, sem þvera akbraut, jafnan að sýna sérstaka aðgát og huga vel að umferð framundan. Sama aðgæsluheilræðið á erindi til reiðhjóla – og bifhjólafólks,“ segir í tilkynningu frá lögreglunni.