Sextán teknir fyrir ölvunar- og fíkniefnaakstur um helgina

Lögreglan stöðvaði 185 ökumenn í sérstöku umferðareftirliti í miðborginni um helgina. Tveir ökumenn reyndust ölvaðir og eiga þeir ökuleyfissviptingu yfir höfði sér. Þar að auki voru fjórtán aðrir ökumenn teknir fyrir ölvunar- og fíkniefnaakstur í umdæminu um helgina.

Lögreglan hafði sömuleiðis afskipti af tæplega fimmtíu ökutækjum í borginni um helgina, en þeim var öllum lagt ólöglega. Þá voru hátt í tuttugu ökumenn stöðvaðir á höfuðborgarsvæðinu um helgina, en ljósabúnaði ökutækja þeirra var áfátt.

Þá myndaði lögreglan ökumenn á Kópavogsbraut í gær. Á einni klukkustund eftir hádegi fóru 56 ökutæki en sex þeirra keyrðu of hratt.

Meðalhraði hinna brotlegu var 64 km/klst en þarna er 50 km hámarkshraði. Sá sem hraðast ók mældist á 70.