Átján viðburðir á dagskrá Jafnréttisdaga

Bíókvöld, málþing, tónleikar, Pub Quiz, fyrirlestrar, stefnumót, sýningar og sviðslistir eru allt hluti af glæsilegri dagskrá Jafnréttisdaga Háskóla Íslands sem hefjast í dag og standa til 17. október. Dagarnir eru nú haldnir í sjötta sinn og í tilkynningu frá HÍ segir að þeir taki til jafnréttis í víðum skilningi en sjónum verði beint að jafnréttismálum bæði innan og utan skólans. Í ár eru 18 fjölbreyttir viðburðir á dagskrá sem allir snúast um jafnrétti frá mismunandi hliðum.

Markmiðið með Jafnréttisdögum er að stuðla að fræðslu og aukinni umræðu og skilningi á jafnréttismálum, innan sem utan háskólasamfélagsins, og stuðla að því að gera jafnréttismál sýnilegri. Meðal þess sem verður rætt á Jafnréttisdögum er valdastaða ólíkra hópa samfélagsins, staða kvenna í kvikmyndum, hvítleiki og rasismi, miðlun tungumála, jafnrétti í námi, Íslendingar og íslensk menning frá sjónarhóli gestsins, Rauðsokkur og frjálsar fóstureyðingar, málefni blindra nemenda í háskólasamfélaginu, birtingarmyndir fatlaðs fólks í fjölmiðlaorðræðu og málefni flóttafólks. Sumir viðburðir eru á ensku og enn aðrir eru með táknmálstúlkun.

Opnunarviðburður Jafnréttisdaga verður haldinn í Stúdentakjallaranum í kvöld kl. 20-22 en þar verður íslensk menning sett undir smásjána. Meðal annarra viðburða má nefna að nemendur Listaháskóla Íslands verða með fjölbreytta sýningu á Háskólatorgi þar sem áhersla er lögð á tengsl kynjafræði og sviðslista og möguleika lista til að skapa umræður um samfélagsleg málefni. Sýningin „Lætur ekkert stöðva sig“ verður á fyrstu hæð á Háskólatorgi og Kaffi Gæs hellir upp á kaffi á Menntavísindasviði 10. október. Lokapunkturinn er svo settur aftan við Jafnréttisdaga með Straight Friendly partýi í Stúdentakjallaranum 17. október þar sem ýmsu verður snúið á hvolf.