„Getum ekki ímyndað okkur Vopnafjörð án Vinavikunnar“

Nú er Vinavika á Vopnafirði og stendur æskulýðsfélag Hofsprestakalls – Kýros fyrir vikunni í fimmta skiptið. Í gær var skrifað undir Vinasamning við Vopnafjarðarhrepp, Vopnafjarðarskóla og leikskólann Brekkubæ.

Í samningnum segir m.a. að aðilar samningsins taki upp forskeytið „Vinur” fyrir framan nafn sitt á og heiti á meðan Vinavikan stendur yfir.

Vina-Vopnafjörður, Vina-Vopnafjarðarskóli og Vina-leikskólinn Brekkubær. Oddviti og sveitarstjóri skrifuðu undir fyrir hönd Vopnafjarðarhrepps og skólastjóri og leikskólastjóri ásamt fulltrúum nemenda fyrir hönd skólanna.

Eftir undirskriftina var boðið upp á Vinaköku, kaffi og djús. Jafnframt höfðu krakkarnir fyrr um daginn skreytt fyrirtæki og stofnanir á Vopnafirði með blöðrum, hjörtum, borðum og vinalegum skilaboðum. Óhætt að segja að Vopnafjörður sé orðin vinalegur og verður enn vinalegri á næstu dögum.

Í dag mega íbúar Vopnafjarðar eiga von á óvæntum glaðning frá æskulýðsfélaginu. Litur Vinavikunnar er bleikur og á morgunn miðvikudag verður bleikur dagur og má segja að við tökum forskot á bleika dag Krabbameinsfélagsins. 

Þá eru allir hvattir til að klæðast bleiku og einnig fara unglingarnir um bæinn á dráttavél, knúsa og skreyta bæinn með bleikum borðum og mála hann bleikan. 

Á fimmtudag verður Vinaskrúðganga og svo er öllum boðið í Vinakökuboð í félagsheimilinu, en í fyrra var fullt út af dyrum. Á föstudaginn er knúsdagurinn og Vinavikunni lýkur með kærleiksmaraþoni, Vinabingó, Vinamessu, pítsuveislu og flugeldasýningu.

Harpa Lind, nemandi í 9. bekk, Bryndís og Hugrún nemendur í 10. bekk virðast vera nokkuð sáttar við Vinavikuna:

„Til að vera góðar fyrirmyndir og sýna gott fordæmi í samfélaginu. Okkur finnst Vinavikan vera mjög uppbyggjandi og skemmtileg vika. Undirbúningurinn er auðvitað frekar erfiður en algjörlega þess virði. Við hvetjum alla til að taka upp Vinaviku og leggja sitt að mörkum í samfélaginu. Nú getum við ekki Ímyndað okkur Vopnafjörð án Vinavikunnar, því sá er vinur sem í raun reynist.“ 

Fram kemur í tilkynningu frá Vopnarfjarðarbæ að tilgangur vikunnar sé að minna á hin sönnu verðmæti lífsins; vináttuna og kærleikann. Meðan vikan stendur yfir eru allir hvattir til taka þátt og sýna umhyggju; heilsa, vinka, brosa, heimsækja, rétta hjálparhönd.

Unglingarnir í æskulýðsfélaginu standa fyrir fjölbreyttri dagskrá og óvæntum viðburðum með almennri þátttöku bæjarbúa í dagskránni. Framkvæmdin er í höndum 20 unglinga sem leggja sig fram um að vel takist til með lífsgleðina í fyrirrúmi.