Vardy: Besti dagur ferilsins

Leicester vann lygilegan 5-3 sigur á Manchester United í ensku úrvalsdeildinni í dag og mun Jamie Vardy, leikmaður Leicester, seint gleyma leiknum.

Vardy kom að öllum fimm mörkum Leicester í leiknum. Hann skoraði eitt, lagði upp tvö og fékk tvö víti.

„Við vitum að við getum unnið öll lið,“ sagði Vardy eftir leikinn í dag. „Við undirbjuggum okkur vel, fundum veikleika í þeirra liði og nýttum okkur þá. Við vitum að við getum skorað og skapað okkur færi.“

Leicester fékk umdeilda vítaspyrnu í stöðunni 3-1 fyrir United. Vardy vann boltann af Rafael í aðdraganda þess en leikmenn United vildu meina að Mark Clattenburg, dómari, hefði átt að dæma aukaspyrnu þá.

„Þetta var ekki aukaspyrna, bara öxl í öxl. Þetta var klárt víti,“ sagði Vardy sem spilaði í utandeildinni fyrir aðeins orfáum árum síðan. „Þetta er besti dagur ferilsins. Ferðalagið hefur ekki verið auðvelt en nú ætla ég bara að hugsa um næsta leik.“