Innlent

Bæjarstjórinn í Kópavogi: „Auðvitað tók ég eftir þessu“

Kolbeinn Tumi Daðason skrifar
Justin Timberlake og Ármann Kr. Ólafsson.
Justin Timberlake og Ármann Kr. Ólafsson. Vísir/Andri Marinó

„Auðvitað tók ég eftir þessu. Ég var alltaf að spá í hversu mikið ég ætti að svekkja mig á þessu,“ segir Ármann Kr. Ólafsson, bæjarstjóri í Kópavogi, hlæjandi í samtali við Vísi.

Líkt og Vísir greindi frá í dag vakti töluverða athygli gesta á tónleikum Justin Timberlake í Kórnum í gær að bandaríski söngvarinn minntist ítrekað á Reykjavík og Ísland. Hins vegar var aldrei minnst á Kópavog.

„Auðvitað vill maður sem bæjarstjóri að íslenskir tónleikagestir séu minntir á að þeir séu í Kópavogi,“ segir Ármann léttur. Hann skilji hins vegar vel að Justin Timberlake upplifi sig í Reykjavík þótt tónleikarnir hafi farið fram í Kópavogi.

„Þetta er fín markaðssetning á Íslandi og húsinu,“ segir Ármann sem er stoltur hvernig til tókst við tónleikana. Til að mynda tók aðeins stundarfjórðung að tæma Kórinn að tónleikunum loknum.

Justin Timberlake í Kórnum í gær. Vísir/Andri Marinó

„Það var allt svo fagmannlegt,“ segir bæjarstjórinn. Hann hafi notið þess að fylgjast með stemningunni hjá tónleikagestum.

„Það voru allir staðráðnir í að njóta augnabliksins og það var líka greinilegt að Justin Timberlake vildi líka fá mikið út úr þessu.“

Ármann reiknar með því að í kjölfar tónleikanna verði kaflaskil í tónleikahaldi á Íslandi.

„Ég á von á því að fleira tónlistarfólk á hátindi ferilsins sæki Ísland heim. Ekki bara listamenn sem eru að hefja eða ljúka ferli sínum.“

Ármann var að sjálfsögðu á meðal tónleikagesta ásamt fjölskyldu sinni. Hann var nýkominn utan af landi en náði á tónleikana í tæka tíð. Gestir höfðu verið hvattir til að notast við almenningssamgöngur ellegar hjóla eða ganga á tónleikana. En hvernig fór sjálfur bæjarstjórinn á tónleikana?

Unnið var hörðum höndum að frágangi í Kórnum í dag. Vísir/Andri Marinó

„Það vill þannig til að ég bý ekki langt frá Kórnum. Ég fékk far með kunningja mínum upp eftir og gekk svo heim,“ segir Ármann. Hann hafi aldrei séð fleiri á göngustígunum í Kópavogi og þar hafi eflaust skipt máli hve veður var gott.

Ármann viðurkennir að hann sé ekki harðasti aðdáandi Timberlake. Hann sé hins vegar týpan sem hlusti á hans vinsælustu lög.

„Ég þekkti ekkert öll lögin,“ segir Ármann sem dáist að söngvaranum hæfileikaríka. „Þessi strákur hefur vakið athygli mína fyrir svo margt. Þessi lög sem ég hef svo hlustað á eru alveg frábær.“

Ármann segist upplifa mjög sterkt hjá Justin Timberlake hversu mikil skírskotun sé til Michael Jackson.

„Þetta er algjör snillingur. Það er greinilegt.“


Tengdar fréttir

Justin ekki meðvitaður um tilvist Kópavogs

Varla hefur farið framhjá nokkrum að Justin Timberlake hélt tónleika á höfuðborgarsvæðinu í gær. Þeir voru þó ekki í Reykjavík eins og bandaríski hjartaknúsarinn tönnlaðist á þær 100 mínútur sem hann tryllti lýðinn.

Kórinn tæmdist á korteri

Það tók aðeins sextán mínútur fyrir alla sautján þúsund gestina á tónleikum Justin Timberlake að komast undir beran himinn í gærkvöldi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.