Dregur umsóknina til baka og íhugar að leita réttar síns

Sr. Hans Markús Hafsteinsson Ísaksen hefur ákveðið að draga umsókn sína um stöðu sóknarprests í Seljakirkju í Breiðholti til baka vegna þess sem hann kallar ómálefnalega málsmeðferð valnefndar og Biskups Íslands.

Líkt og fjallað var um í Fréttablaðinu á dögunum hafði valnefnd í Seljaprestakalli einróma valið prest síðastliðið vor. Um var að ræða karlmann sem starfað hefur við sóknina undanfarin ár. Biskup Íslands, Agnes M. Sigurðardóttir, hafnaði hins vegar valinu þar sem hún taldi jafnréttislög brotin auk þess sem einn umsækjandinn, kona, væri umtalsvert hæfari hvað varðaði menntun og starfsreynslu.

Hans Markús rekur sögu sína við Seljaprestakall þar sem hann sótti um stöðu prests árið 2009.

„Í umsóknarferlinu braut biskup og valnefnd kirkjunnar lög við val á umsækjendum. Var það staðfest með áliti umboðsmanns Alþingis og í kjölfarið var málið leyst með samkomulagi um að Biskupsstofa greiddi mér miskabætur vegna hinnar ólögmætu málsmeðferðar,“ segir í yfirlýsingu Hans Markúsar til fjölmiðla.

Hann hafi einnig verið eini umsækjandinn um lausa stöðu prests í mars síðstliðnum. Valnefnd hafi hins vegar kosið að mæla með starfandi presti „þrátt fyrir að undirritaður og fleiri umsækjendur væru hæfari til starfans með hliðsjón af menntun og starfsreynslu.“

Sóknarbörn í Seljasókn óskuðu í kjölfar ákvörðunar biskups eftir prestkosningum sem fram fara á laugardaginn.

Hans Markús, sem undanfarin ár hefur starfað sem sóknarprestur í Noregi og hefur „áralanga reynslu sem sóknarprestur í Garðaprestakalli og héraðsprestur í Reykjavíkur prófastsdæmi vestra, sem prestur eldriborgara“ segir í ljósi þess sem á undan sé gengið og ítrekaðra og óásættanlegra brota valnefndar prestakallsins á lögum dragi hann umsókn sína til baka.

„Ég óska þeim presti sem verður fyrir vali í kosningum velfarnaðar í starfi og sóknarbörnum í Seljasókn alls hins besta. Hvað varðar biskupsstofu og valnefnd prestakallsins mun undirritaður hins vegar skoða hvort ástæða sé til að leita réttar míns vegna þeirrar valdmisbeitingar sem þessir aðilar hafa nú ítrekað gerst sekir um,“ segir í yfirlýsingunni.