„Guð hefur hjálpað mér í gegnum þetta“

Hákon Atli Hallfreðsson, miðjumaður FH, er í óða önn að verða klár á ný. Hákon var í viðtali við FH.is á dögunum þar sem hann ræddi undanfarin ár sem hafa reynst Hákoni erfið.

Hákon hefur ekki spilað leik frá árinu 2011 þegar hann fór útaf vegna meiðsla í leik gegn ÍBV. Meiðslin hafa plagað Hákon síðan og bæði hnén hafa verið til vandræða hjá Hákoni.

„Staðan á mér er mjög fín. Ég er byrjaður að æfa með liðinu og fyrsta æfingin með þeim var á mánudaginn. Ég er bara verða nokkur góður. Ég myndi ekki segja að það væri langt í það ég verði 100%. Það tekur sinn tíma að komast í form en það styttist í það."

Meiðslin hafa tekið sinn toll hjá Hákoni. Hákon viðurkenndi að biðin hefði verið erfið.

„Þetta var mjög erfitt. Ég er búinn að fara í sex speglanir og það tekur á andlega. Ég er mjög trúaður og Guð hefur hjálpað mér í gegnum þetta. Hann hefur gefið mér styrk og kraft til að takast á við þessa erfiðleika og ég á honum mikið að þakka."

Hákon viðurkenndi að það kom tímabil þar sem hann íhugaði að leggja skónna á hilluna.

„Það komu tímabil þar sem þetta var orðið mjög svart og maður sá ekki fyrir endan á þessu. Það kom upp í hausinn, en maður ákvað að gefast ekkert upp og ákvað að halda áfram. Ég fór mjög oft í sundlaugina að hlaupa til þess að halda mér í formi. Síðan var það bara lyftingarklefinn í tvö ár."

„Silja hefur hjálpað mér mikið með lyftingar og síðan má ekki gleyma Robba Magg, sjúkraþjálfara. Ég veit ekki hvar ég væri án hans, hann er kraftaverkamaður. Hann er búinn að reynast mér frábær þessi ár."

Hákon var alltaf í treyju númer 19 en hann verður í treyju númer 9.

„Bjössi var númer níu og Matti Vill var að fara út í atvinnumennsku og hann var í tíunni. Bjössi fór í tíuna og nían var laus þannig ég ákvað að taka níuna. Ég tók henni fagnandi."

Hákon var annars nokkuð bjartsýnn á sumarið sem framundan er.

„Mig hlakkar ótrúlega til að komast út á völlinn. Ég get ekki lýst því með orðum. Það verður bara ótrúlega gaman að komast út á völlinn og spila."

„Mér finnst við mjög líklegir til að taka titilinn. Við getum bara bætt spilamennskuna og erum á toppnum núna. Við getum verið mjög jákvæðir varðandi næstu leiki og það sem framundan er,“ sagði Hákon í samtali við FH.is