Uppbótartíminn: Líflátshótanir og Óla Þórðar dúkka sem talar

Fimmta umferð Pepsi-deildar karla í knattspyrnu kláraðist í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttum nótum.

FH og Stjarnan eru áfram í tveimur efstu sætum deildarinnar með ellefu stig hvort eftir jafntefli í gærkvöldi. Þórsarar rifu sig af botninum með stórsigri á Fylki og þá eru Eyjamenn áfram í miklum vandræðum sem og Blikar sem eru án sigurs.

Umfjöllun og viðtöl úr öllum sex leikjum umferðarinnar:

ÍBV - Víkingur 1-2

Keflavík - FH 1-1

Þór - Fylkir 5-2

Fjölnir - KR 1-1

Fram - Breiðablik 1-1

Stjarnan - Valur 1-1

Góð umferð fyrir ...

... Ögmund Kristinsson, Fram

Markvörðurinn öflugi stóð sig frábærlega á móti Breiðabliki í gærkvöldi og var helsta ástæða þess að Blikar unnu ekki sinn fyrsta sigur í deildinni. Ekki amalegt að bjóða upp á svona frammistöðu degi áður en nýr landsliðshópur er valinn. Því miður fyrir Ögmund dugðu hetjudáðir hans ekki til sigurs að þessu sinni.

... Pál Viðar Gíslason, þjálfara Þórs

Þórsarar þurftu einfaldlega að vinna í gær, sama hvað. En valta svona yfir Fylkismenn og skora fimm mörk í fyrri hálfleik létti svo sannarlega yfir mönnum í þorpinu. Það var ótrúlega mikilvægt fyrir Pál Viðar að koma liðinu á blað í hraðmótinu. Stjórnarmenn Þórs hefðu annars haft of mikið slæmt að hugsa um í landsleikjahléinu.

... Kolbein Kárason, Val

Það leit ekki út fyrir að Kolbeinn myndi spila mikið á næstunni þegar Patrick Pedersen mætti sjóðheitur frá Danmörku og skoraði tvö í fyrsta leik. Daninn meiddist, að því virtist illa, gegn Stjörnunni og í hörðum fótboltaheimi er eins manns dauði annars brauð. Kolbeinn kom inn á og skoraði jöfnunarmarkið á síðustu mínútu leiksins. Tvö mörk komin hjá boxaranum í deildinni.

Erfið umferð fyrir ...

... Fylkismenn

Hvar skal byrja? Einn reynslumesti maður liðsins, Gunnar Örn Jónsson, lætur reka sig út af fyrir að sparka í andstæðing. Hermann Hreiðarsson lætur reka sig út af í hálfleik sem varamaður án þess að spila mínútu fyrir liðið og svo fær það á sig fimm mörk í fyrri hálfleik! Fylkismenn voru rifnir með látum niður á jörðina eftir tvo sigra í röð. Þetta var eins slæmt tap og þau gerast.

... Jóhannes Karl Guðjónsson, Fram

Jói Kalli er ekki búinn að byrja þetta mót vel og ekki þótti hann heldur standa sig í Dalnum í gær. Landsliðsmaðurinn fyrrverandi kom lítið sem ekkert við sögu í leiknum og toppaði slakan leik sinn með því að gefa víti á lokamínútu leiksins sem kostaði liðið tvö stig.

... Einar Orra Einarsson, Keflavík

Miðjumaðurinn klettharði gæti verið í vandræðum eftir jafnteflið gegn FH í gærkvöldi en hann brást illa við þegar hann var rekinn af velli undir lok leiksins. Brotið var á Einari Orra sem rauk í Böðvar Böðvarsson, leikmann FH, og fékk fyrir það sitt annað gula spjald. Hann sendi Böðvari svo óskemmtilega handabendingu, öskraði á fjórða dómarann og hrækti að varamannaskýli FH á leið sinni til búningsklefa.

Tölfræðin:

*Eyjamenn hafa tapað þremur fyrstu heimaleikjum sínum í Pepsi-deildinni. Það eru meira en tveir áratugir síðan að Eyjamenn spiluðu þrjá heimaleiki í röð á sama tímabili án þess að fá eitt einasta stig. ÍBV tapaði þremur heimaleikjum í röð í ágúst og september 1993. Eyjamenn töpuðu líka tveimur síðustu heimaleikjum sínum í fyrra og eru því búnir að tapa fimm leikjum í röð á Hásteinsvellinum.

*Þórsarar eru eina liðið í Pepsi-deildinni sem hefur brotið tíu marka múrinn eftir fyrstu fimm umferðarinnar. Liðið sem vann sinn fyrsta sigur í 5. umferð og situr í 10. sæti deildarinnar er því markahæsta liðið eftir hraðmótið. Þórsliðið skoraði sjö af þessum tíu mörkum sínum í tveimur samliggjandi hálfleikjum, tvö mörk í seinni hálfleik í 3-4 tapi á móti Stjörnunni og fimm mörk í fyrri hálfleik í 5-2 sigri á móti Fylki.

*Fjölnismenn eru búnir að setja nýtt félagsmet í efstu deild með því að fá stig í fimm leikjum í röð en Grafarvogspiltar gerðu jafntefli í þriðja leiknum í röð í 5. umferð eftir sigra í tveimur fyrstu umferðunum. Fjölnir náði aldrei í stig í meira en tveimur leikjum í röð þegar liðið spilaði síðast í úrvalsdeildinni sumarið 2009.

*FH-ingurinn Atli Viðar Björnsson er búinn að skora tvö mörk í Pepsi-deildinni þrátt fyrir að hafa spilað aðeins í 52 mínútur. Hann kom inn á sem varamaður á 64. mínútu á móti bæði ÍBV og Keflavík, skoraði sigurmarkið á móti ÍBV og tryggði FH síðan jafntefli á móti Keflavík.

*FH hefur aðeins fengið á sig tvö mörk í fyrstu fimm umferðunum og þau hafa bæði komið á 3. mínútu. Róbert Örn Óskarsson var búinn að halda marki sínu hreinu í 357 mínútur þegar Keflvíkingurinn Elías Már Ómarsson skoraði hjá honum á 3. mínútu í gær eða allt síðan að Blikinn Tómas Óli Garðarsson skoraði hjá honum á 3. mínútu í fyrstu umferð.

Skemmtilegir punktar úr boltavaktinni:

Guðmundur Tómas Sigfússon á Hásteinsvelli:

„Sigurður Ragnar, þjálfari Eyjamanna, hefur svarað kalli stuðningsmanna og er búinn að losa sig við gráu Hummel-hettupeysuna og mætir til leiks í hvítri skyrtu.“

Ólafur Haukur Tómasson á Þórsvelli:

„Þórsarar virðast ætla að reyna allt sem þeim dettur í hug til að snúa við gengi liðsins. Yfirleitt hita þeir upp vinstra meginn á vellinum en í dag eru þeir hægra meginn. Gengur það upp hjá þeim?“    

Ingvi Þór Sæmundsson í Laugardal:

„Jóhannes Karl Guðjónsson hefur gert heiðarlega tilraun til að leika ósýnilega manninn hér í kvöld. Hann er ekki þátttakandi í þessum leik.“    

Hæstu og lægstu einkunnir umferðarinnar:

Hlynur Atli Magnússon, Þór - 8

Þórður Ingason, Fjölni - 8

Farid Zato, KR - 8

Ögmundur Kristinsson, Fram - 8

Gunnar Örn Jónsson, Fylki - 2

Einar Orri Einarsson, Keflavík - 3

Pétur Viðarsson, FH - 3

Jóhannes Karl Guðjónsson, Fram - 3

Niclas Vemmelund, Stjörnunni - 3

Umræðan á Twitter:

Mig langar í Óla Þórðar Baby born dúkku sem talar.

— Sóli Hólm (@SoliHolm) May 22, 2014

Djöfull setti eg hann i kvöld!!!

— Sveinn Elías Jónsson (@sveinnelias) May 22, 2014

Djöfull er Homer G. flottur um hausinn! #Svalur#Gamli

— Hjörtur Hjartar (@hjorturh) May 22, 2014

Að leika það að “skera leikmann á háls” og hrækja á bekk andstæðings á að vera minnst 10 leikja bann #sturlun#my2cents#kefFH#Pepsi365

— Haukur Heiðar Haukss (@Haukur_Heidar) May 22, 2014

Drap Einar Orri #Böddilöpp eða sagði hann eitthvað við hann í fótboltaleik? Ekki viss miðað við viðbrögð fólks... #fotbolti#prayforLöppin

— Ómar Jóhannsson (@Omarjo13) May 22, 2014

Nær Siggi Raggi ekki bara í Þóru B Helgadóttur í markið hjá ÍBV?? #fotbolti#pepsi365

— Styrmir Sigurðsson (@StySig) May 22, 2014

Mark umferðarinnar: Pepsi-mörkin velja mark umferðarinnar í hverjum þætti og að þessu sinni er það Kolbeinn Kárason sem tekur sviðið með jöfnunarmarki sínu gegn Stjörnunni. 'Laglega gert hjá svona stórum manni,“ sögðu spekingarnir. Atvik 5. umferðar: Pepsi-mörkin völdu markið sem Grétar Sigfinnur Sigurðarson, miðvörður KR, skoraði en var ranglega dæmt af vegna rangstöðu atvik 5. umferðarinnar. Illa farið með KR-inga þarna sem hefðu getað tryggt sér sigurinn.