Aðgerðirnar hófust við Engihjalla

Sjónarvottur segir lögreglumenn hafa brotið sér leið inn í íbúð við Engihjalla í Kópavogi skömmu áður en karlmaður var handtekinn við Strandasel í Breiðholti um klukkan fimm í dag.

RÚV greindi frá því að lögreglubíl hafi verið ekið utan í bíl hins handtekna til að stöðva hann en fjórir lögreglubílar voru á vettvangi og lá sá handtekni á maganum á götunni með lögreglumann ofan á sér.

Sjónarvotturinn segist hafa verið nýkominn heim úr vinnu þegar lögreglumenn komu úr bílum fyrir utan eina blokkina í Engihjalla. Þeir hafi verið með „óeirðaskjöld, kúbein og hólk til þess að dúndra niður hurðir“ og síðan hafi þeir farið inn í eina íbúðina.

Skömmu síðar hafi lögreglumennirnir komið hlaupandi út og brunað af stað á bílunum niður Dalveg og í átt að Seljahverfi. Sjónarvotturinn segist vera ýmsu vanur úr Engihjallanum, þar sem hann hefur búið um árabil, en hann hafi aldrei séð neitt þessu líkt.

Ekki náðist í lögreglu þrátt fyrir ítrekaðar tilraunir Vísis í kvöld.