Innlent

Fljúgandi klósett rústaði bíl á Sólvallagötunni

Kjartan Atli Kjartansson skrifar
Hér má sjá Volkswagen Golf bifreið Huberts og klósettið þarna á gangstéttinni við Sólvallagötu.
Hér má sjá Volkswagen Golf bifreið Huberts og klósettið þarna á gangstéttinni við Sólvallagötu. Vísir/aðsent
Honum Hubert Lewandowski brá heldur betur í brún þegar hann kom að bíl sínum sem var lagt við Sólvallagötu í Vesturbænum á þriðjudagsmorgun. Svo virðist sem fljúgandi klósett hafi eyðilagt bílinn, sem er af tengundinni Volkswagen Golf.



„Ég var að heimsækja vinkonu mína. Við ætluðum að fara að fá okkur kaffi,“ segir Hubert í samtali við Vísi. Hann segir að sér hafi brugðið mjög þegar hann kom út.



„Ég vissi ekki hvað ég átti að gera.“



Atvikið er Hubert algjörlega óskiljanlegt. Hann veit ekki hvaðan klósettið kom en þó er greinilegt að það hefur komið að ofan. Framrúða bílsins ber þau merki.



Bíllinn stendur enn við Sólvallagötu en fjórir dagar eru liðnir frá atvikinu. Er fátt annað í stöðunni fyrir Hubert en að láta draga bílinn og hefur hann leitað til vina eftir hjálp.



Tekur strætó í vinnuna

Bíllinn er illa farinn eftir þetta ótrúlega atvik. Framrúðan er mölbrotin og lakkið illa farið. Hubert, sem starfar hjá kranaþjónustufyrirtæki, tekur strætó í vinnuna á meðan hann finnur lausn á vanda sínum.



„Ég er nú ekkert að stressa mig á þessu,“ segir hinn afslappaði Pólverji.



Hann ætlar að leita eftir nýrri framrúðu í bílinn á bílapartasölum og hefur beðið vin sinn, sem vinnur á verkstæði, um að hjálpa sér að skipta um rúðu.



„Já það er gott að eiga góða vini,“ segir Hubert.



Hubert hefur ekki haft samband við yfirvöld vegna málsins og ætlar sér bara að laga bílinn sjálfur og halda svo áfram ótrauður – pollrólegur eftir að hafa fengið fljúgandi klósett á bílinn sinn.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.