Kraumandi óánægja meðal margra

„Þetta kemur mér verulega á óvart og veldur miklum vonbrigðum, þó maður sé ýmsu vanur,“ segir Helgi Magnússon, framkvæmdastjóri og fyrrverandi formaður Samtaka iðnaðarins, um þá niðurstöðu þingflokks Sjálfstæðisflokksins að styðja tillögu utanríkisráðherra að draga aðildarumsókn Íslands í Evrópusambandið til baka. Helgi var meðal þeirra sem tók til máls á fundi Félags sjálfstæðra Evrópusinna fyrr í dag.

„Ég skil ekki hvað liggur á,“ segir Helgi, sem hefði viljað sjá stjórnarflokkana bíða eftir því að skýrsla Alþjóðastofnunnar Háskóla Íslands lægi fyrir áður en ákvörðun væri tekin í þessum efnum.

„Það er greinilegt að þeir óttast innihald þeirrar skýrslu,“ segir Helgi. „Ef þeir fara fram með þetta án þess að það sem er í skýrslunni komi fram eru þeir að taka þá áhættu að aðilar vinnumarkaðarins eigi erfitt að vinna með þeim.“

„Ég hef aldrei vitað um ríkisstjórn sem hefur ekki reynt að eiga gott samstarf með aðilum vinnumarkaðarins, þetta er alveg nýtt.“

Helgi segist sérstaklega vonsvikinn í ljósi þess að flokksmönnum hafi verið talin trú um að gengið yrði til atkvæðagreiðslu um framhald viðræðna.

„Maður hefur ekki ætlast til mikils af Framsókn en Bjarni Benediktsson lofaði hátíðlega að það yrði kosið um framhald viðræðna á fyrrihluta kjörtímabils,“ segir Helgi. „Margir kusu hann út á þetta loforð. Ég sagði á fundinum í dag að ég hefði kosið út á þetta loforð.“

Rætt hefur verið um klofning innan Sjálfstæðisflokksins vegna mismunandi afstöðu þungavigtarfólks innan flokksins gagnvart umsóknarviðræðunum. Meðal annars hefur það verið nefnt að einhverjir flokksmenn gætu reynt að stofna nýjan flokk vegna þessa.

„Það eru ekki alveg að koma kosningar og ég veit ekki til þess að það sé nein slík vinna í gangi,“ segir Helgi um málið. „En ég geri mér það ljóst að það er orðin kraumandi óánægja meðal margra. Fólk á hægri væng og miðju hlýtur að hugsa sinn gang.“