Átt þú þessa skó?

Lögreglan á höfuðborgarsvæðinu hefur nú brugðið á það ráð að setja inn myndir af óskilamunum á netið í von um að réttir eigendur finnist. Þetta kemur fram á fésbókarsíðu lögreglunnar.

Myndirnar eru birtar á Pinterest-síðu lögreglunnar en þar má sjá fjölda reiðhjóla, gsm-síma og annarra muna eins og myndavéla, lykla og jafnvel skó.

Fjöldi fólks hefur deilt síðunni að beiðni lögreglunnar sem er mjög virk á samfélagsmiðlunum.

Munir sem ekki komast í hendur eigenda og eru ekki persónulegs eðlis eru jafnan seldir á uppboðum. Samkvæmt upplýsingum lögreglu rennur andvirði uppboðanna til mannúðarmála.