Viðurlögin allt að þriggja mánaða fangelsi og fjársekt

Landhelgisgæslunni barst tilkynning um leka í bát sem var á siglingu á Faxaflóa á sunndaginn. Skipverjar tilkynntu um lekann á neyðarrás og að þeir væru allir komnir í flotgalla.

Nú leikur grunur á því að um gabb hafi verið að ræða en eftir mikla leit hefur ekki tekist að finna bát né skipverja.

Varðstjórar í stjórnstöð Landhelgisgæslunnar heyrðu aðstoðarbeiðni á rás 16 sem er neyðar og uppkallsrás skipa og báta.

„Okkur vantar aðstoð – við erum úti við Faxaflóa – Yfir - Báturinn er farinn að leka mikið og við erum að fara í flotgallana“.

Samstundis var hafin víðtæk leit en skilaboðin heyrðust einnig í harðbotna björgunarbát Slysavarnarfélagsins Landsbjargar á Akranesi. Þyrlur Landhelgisgæslunnar voru kallaðar út auk kafara og björgunarskipa Slysavarnarfélagsins Landsbjargar.

Finnskar björgunarþyrlur sem taka þátt í æfingunni Iceland Air Meet 2014 voru einnig við leit og Samhæfingarstöð almannavarna var virkjuð. Allt að tvö hundruð manns tóku þátt. Ef um gabb hafi verið að ræða ku það vera gríðarlega alvarlegt mál.

„Það má leiða líkum að því að þetta hafi verið gabb,“ sagði Ásgrímur L. Ásgrímsson, framkvæmdastjóri aðgerðarsviðs LHG, í viðtali í þættinum Reykjavík Síðdegis á Bylgjunni í gær.

„Við fórum vandlega í gegnum okkar kerfi á sunnudaginn og þá kom í ljós að einskins bát var saknað. Það er ljóst að um var að ræða íslenska skipverja þar sem neyðarkallið var á íslensku.“

„Lögreglan er að aðstoða okkur við rannsókn málsins og hvort hugsanlega einhver hafi getað farið út á sjó án þess að vera skráður í okkar kerfum.“

„Það er enginn leið að rekja neyðarkallið í þessu tilfelli. Um er að ræða vhf fjarskipti.“

„Þetta var gríðarlega umfangsmikil leit en alls tóku fimm björgunarskip þátt og fjórar þyrlur. Einnig voru töluvert margir harðbotna bátar og bílar á landi. Allt í allt tóku um 200 manns þátt í leitinni.“

„Við teljum nú líklegt að um gabb hafi verið að ræða en útilokum ekki neitt enn sem komið er. Sem betur fer er svona ekki algengt hjá Landhelgisgæslunni en viðurlögin við svona brot geta verið fjársektir og allt að þriggja mánaða fangelsi.“

Ljóst er að kostnaðurinn við leitina hleypur á milljónum.

Hér má hlusta á viðtalið úr þættinum Reykjavík Síðdegis á Bylgjunni í gær.