Anderson segir ummælin skálduð

Brasilíumaðurinn Anderson segir að ummæli sem höfð voru eftir honum í fjölmiðlum ytra í gær hafi verið röng.

Í viðtalinu á Anderson að hafa sagt að fjölmargir leikmenn Manchester United vildu losna frá félaginu. Sjálfur er hann á mála hjá United en í láni hjá Fiorentina á Ítalíu.

„Ég er í sjokki og undrandi á meintu viðtali sem átti sér aldrei stað,“ skrifaði Anderson á Instagram-síðu sína eins og sjá má hér fyrir neðan.

„Ég myndi aldrei segja nokkuð slæmt um félagið sem ég elska og gaf mér svo mikið. Skammist ykkar!“