"Þar átti ég að vera sæt og þegja"

„Ég ætla ekki lengur að sætta mig við að vera þæga og góða stúlkan,“ segir kona á sjötugsaldri, sem hefur stofnað bloggsíðu til að berjast gegn kvenfyrirlitningu. Hún kveðst alla ævi hafa fundið fyrir niðrandi framkomu gagnvart konum.

Bloggsíða sem félagsráðgjafinn Nanna Mjöll Atladóttir byrjaði með í gær hefur heldur betur vakið athygli og sterk viðbrögð. Við heimsóttum hana á vinnustað hennar í Laugarási í dag.

Strax í morgun höfðu yfir tólf þúsund manns farið inn á síðu Nönnu. Í fyrstu færslunni segir meðal annars: „Ég hef nú skorað á sjálfa mig að hætta að vera meðvirk með körlum sem niðurlægja konur. Ég ætla ekki lengur að sætta mig við að vera þæga og góða stúlkan. Ég mun mótmæla öllu misrétti og ójöfnuði sem ég verð vitni að.“

Af hverju ákvaðstu að stofna þetta blogg?

„Mig langaði bara að fá umræðu um kvenfrelsismál og ég vona að þetta skili minni fordómum og kvenfyrirlitningu,“ segir Nanna.

Í fyrstu færslunni nafngreinir hún samstarfsmann sinn á Heilsugæslunni í Laugarási, lækni  sem hún segir ítrekað hæðast að konum. Hún hyggst þó ekki nafngreina fleiri. „Ég vil endilega reyna að færa þessa umræðu áfram út í þjóðfélagið. Þetta er lítill vinnustaður og ég vil ekki valda neinum deilum hérna innanhúss.“

Hún kveðst hafa fundið fyrir niðrandi framkomu gagnvart konum alla sína ævi. „Ég hef unnið á mörgum kvennavinnustöðum og mér dettur til dæmis í hug þegar ég var 19 ára og byrjaði að vinna sem flugfreyja. Þar átti ég að vera sæt og þegja, eins og alls staðar annars staðar.“

Margir hafa lýst yfir stuðningi sínum við skrif Nönnu. „Og svo hafa verið síðri viðbrögð líka, meðal annars hafa komið athugasemdir héðan frá vinnustaðnum,“ segir hún.

Aðrir starfsmenn heilsugæslunnar í Laugarási kusu að tjá sig ekki en boðað hefur verið til starfsmannafundar á morgun. „Ég vona að við komum okkur saman um að hafa áfram góðan anda hérna,“ segir Nanna.

En ætlar þú að halda ótrauð áfram að blogga?

„Já, ég ætla að gera það.“