Spyrja hvaða hvatir liggi að baki störfum Ríkisendurskoðunar

Framsóknarflokkurinn hefur sent frá sér tilkynningu vegna forsíðufréttar Fréttablaðsins í dag. Þar kom fram að Ríkisendurskoðun íhugi að kæra flokkinn til lögreglu fyrir brot á lögum um fjármál stjórnmálaflokka þar sem flokkurinn tók við tveimur styrkjum yfir löglegri upphæð.

Í tilkynningunni hafnar Framsóknarflokkurinn því að málið hafi verið tekið upp að frumkvæði Ríkisendurskoðunar, eins og kom fram í fréttinni, heldur hafi flokkurinn sjálfur bent á það að greiðslurnar hafi verið yfir leyfilegri hámarksupphæð.

Því er velt upp í tilkynningunni hvaða hvatir liggi að baki störfum Ríkisendurskoðunar þar sem hún hyggist kæra Framsóknarflokksins vegna mistaka sem hafi verið leiðrétt, auk þess sem stofnunin veitti Fréttablaðinu rangar upplýsingar um aðkomu flokksins að málinu.

Tilkynninguna má sjá í heild sinni hér:

„Vegna forsíðufréttar Frettablaðsins í dag er rétt að taka fram að Framsóknarflokkurinn upplýsti Ríkisendurskoðun um að tvö fyrirtæki hefðu greitt til flokksins umfram það sem lög heimila. Það er ekki rétt sem fram kemur í frétt blaðsins, og haft er eftir talsmanni Ríkisendurskoðunar, að ábending um þetta hafi komið frá Ríkisendurskoðun. Hið rétta er að upplýsingarnar komu frá Framsóknarflokknum. Frumkvæðið var Framsóknarflokksins á öllum stigum málsins.

Mistökin eru tilkomin vegna þess að ein flokksdeild, af um 80, hafði fyrir mistök ranglega flokkað einn styrk að upphæð 62.750 kr. og í öðru tilfelli hafði Samband ungra Framsóknarmanna (SUF) fengið 40.000 kr. án þess að eftir því væri tekið innan ársins, en misræmi kom fram við gerð samstæðureiknings og leiðrétt í kjölfarið.

Fjárhæðirnar sem um er að tefla eru smávægilegar og viðbrögð flokksins voru þau að leiðrétta mistökin umsvifalaust þegar þau urðu ljós. Því fer víðs fjarri að nokkuð saknæmt hafi átt sér stað í tengslum við mál þetta og fullyrðingar um refsivert athæfi eru úr lausu lofti gripnar. Það er því með öllu óskiljanlegt af hverju Fréttablaðið með stuðningi Ríkisendurskoðunar kýs að slá upp á forsíðu máli sem byggist á minni háttar mistökum sem hafa verið leiðrétt. Og það að frumkvæði flokksins sjálfs.

Spyrja má hvaða hvatir liggi að baki í störfum Ríkisendurskoðunar þegar hún hugleiðir að kæra verði Framsóknarflokkinn til lögreglu vegna þessara mistaka sem hafa verið upplýst að öllu leyti ásamt því að veita Fréttablaðinu rangar upplýsingar að aðkomu Framsóknarflokksins að málinu.“