Biðin gæti kostað Ísland mikið

"Tíminn hefur liðið og nú er það um eitt og hálft ár síðan Bretar vildu halda fund um mögulegt verkefni um sæstreng og ennþá eru engar viðræður komnar í gang“, sagði Ketill Sigurjónsson lögfræðingur í fréttum Stöðvar tvö og undrast hvers vegna íslensk stjórnvöld kanna ekki hvað bretar hafa að bjóða í viðræðum við þá. Annars fáist engin skýr svör um hvað gæti mögulega verið hagkvæmt, hvað sem líður öllum úttektun og skýrslum sem gerðar eru um málið.

Risastórt efnahagslegt tækifæri

Sæstrengur á milli Íslands og Bretlands gæti orðið stærsta efnahagslega tækifæri Íslands. Nýlegt mat ENTSO, samtaka Evrópskra raforkuflutningsfyrirtækja segir hagnaðinn geta orðið árlega frá 290 til 450 milljónum evra eða á milli 44 og 69 milljarða króna sem löndin myndu deila. Þetta kemur fram í hagsjá Landsbankans frá því á þriðjudag. Óvissan tengist helst því hvaða verð Bretar eru tilbúnir að borga.

Margir mánuðir eru síðan bresk stjórnvöld reyndu að fá fund með iðnaðarráðherra til að ræða möguleg orkukaup en því var hafnað á þeim forsendum að ráðherra þyrfti að ræða málið frekar heima fyrir sem var gert, á þingi og í ríkisstjórn.

Beðið um viðræðufund

Engar skuldbindingar fólust þó í því að funda úti í Bretlandi eins og bent var á í tölvupóstum sem Ketill Sigurjónsson lögfræðingur og orkubloggari um langa hríð fékk senda frá íslenskum og breskum stjórnvöldum.

Ketill fékk tölvupóstana á grundvelli breskra laga um upplýsingaskyldu. Skjölin úr íslensku stjórnkerfi fengust eftir margítrekaða beiðni þar um, segir Ketill á bloggsíðu sinni.

Ragnheiður Elín Árnadóttir, iðnaðarráðherra segist ekki hafa fengið nein formleg boð um viðræður við orkumálaráðuneyti Breta. Meldingar um slíkt hafi einungis komið frá sendiráði Íslands í London.

Verðskrá fyrir nýja orkugjafa

Bretar standa frammi fyrir orkuskorti á næstu áratugum og vilja auk nýta meiri endurnýjanlega orku. Á þeim tíma sem reynt var að fá íslensk stjórnvöld til viðræðna var samþykkt í Bretlandi nýtt kerfi þar sem ábyrgst er tiltekið lágmarksverð fyrir raforku. Það leiddi til samninga við norsk og dönsk fyrirtæki um um nýja vindorkugjafa.

Undrast að engar viðræður séu í gangi

„Ég tel að íslensk stjórnmál hafi ekki nýtt sér tækifærið sem bauðst í fyrra til þess að fara í viðræður við breta. Það var mjög mikill áhugi hjá breska orkumálaráðherranum sem var þá og talaði um að ef það yrði sæstrengur þá gæti orkan hugsanlega sætt sömu meðferð og önnur ný orkuverkefni í Bretlandi þar sem ábyrgst er mjög hátt lágmarksverð fyrir raforkuna. Þetta kann að vera allt opið ennþá en það sem maður undrast er, því þarna er mjög stórt tækifæri fyrir okkur, af hverju formelgar viðræður fara ekki af stað”, sagði Ketill í fréttum Stöðvar tvö.

Biðin getur kostað Ísland stórt tækifæri

Hann bendir á að Bretar muni ekki bíða endalaust eftir því að Íslendingar vilji ræða við þá um möguleg orkuviðskipti. "Bretar hafa ekki ómælda fjármuni heldur eru það þau verkefni sem koma fyrst fram á borðið sem fá framgang og gott orkuverð. Verkefni sem að tefjast eru líklegust til að deyja út".