Óskar Örn skrifaði undir nýjan samning við KR í kvöld

Óskar Örn Hauksson verður áfram í KR en það var ljóst í kvöld þegar þessi snjalli vængmaður skrifaði undir nýjan samning við Vesturbæjarfélagið. Þetta kom fram í fréttatilkynningu frá KR í kvöld.

Óskar Örn hefur bæði verið orðaður við FH og Keflavík en KR-ingar vildu ekki missa þennan snjalla leikmann sem var með fjögur mörk og fimm stoðsendingar í Pepsi-deildinni í sumar.

Óskar Örn gerði þriggja ára samning við KR en hann hefur spilað með félaginu frá og með árinu 2007 og unnið sex stóra titla sem leikmaður KR.

Óskar Örn er nú tólfti markahæsti KR-ingurinn með 69 mörk og fimmti leikjahæstur með 293 leiki.