„Kolgrafafjörður verður óbyggilegur ef síld drepst þar aftur“

Kolgrafafjörður verður óbyggilegur ef síld drapst þar aftur í stórum stíl.“ Þetta segir bóndi á Eiði en hann og fleiri íbúar í og við Kolgrafafjörð krefjast þess nú að loka brúnni sem þverar fjörðinn. Annars sé ómögulegt að koma í veg fyrir frekari síldardauða.

Umfangsmiklar mælingar standa nú yfir í Kolgrafafirði þar sem áhrif þverunar fjarðarins eru rannsökuð. Íbúar á svæðinu hafa farið fram á við umhverfis- og auðlindaráðherra að firðinum verði lokað.

Alls drápust fimmtíu þúsund tonn af síld í desember og febrúar, af þeim voru tuttugu og fimm þúsund grafin í fjörunni við bæinn Eiði. Íbúar á svæðinu reyna nú að finna lausn svo að hægt sé að koma í veg fyrir að slíkur atburður eigi sér stað á ný. Sérstaklega er horft til brúarinnar sem þverar fjörðinn.

Umhverfisstofnun hefur birt drög að viðbragðsáætlun ef síldardauði á sér stað á ný í firðinum. Heimamenn ítreka að tímanum sé betur varið í fyrirbyggjandi lausnir

„Það er bara ein leið til að fyrirbyggja þetta,“ segir Bjarni Sigurbjörnsson, bóndi á Eiði í Kolgrafafirði. „Hún er að loka að brúnni. Þetta er örugglega mjög dýr framkvæmd en það er líka dýrt að láta síldina drepast. Það drepst mögulega mun meira en síðast og það er líkur á að það verði raunin, enda er súrefnið lítið í firðinum.“

Samkvæmt áætlun Umhverfisstofnunar myndi urðun síldar, af svipuðu umfangi í desember og febrúar, kosta um milljarð króna og fara fram við Fíflholt.

Síldin lónir nú rétt fyrir utan fjörðinn. Bjarni segir það vera nauðsynlegt að loka brúnni, að minnsta kosti þangað til að vísindamenn hafa unnið sína vinnu í firðinum. Niðurstöður mælinga liggja fyrir á næsta ári.

„Það er umhverfisslys að loka ekki brúnni og það er sjálfsagt umhverfisslys að gera það.“

Mengunin er sannarlega til staðar í Kolgrafafirði. Enn er grútur víða og óþefur liggur yfir fjörunni. Þetta hvalhræ rak inn í lónið fyrir neðan Eiði í vikunni og liggur þar rotnandi í svarti eðju, hún ber vitni um þær þúsundir tonna sem grafin voru á svæðinu.

„Ef þetta gerist aftur þá er vandamálið miklu stærra en síðast. Fjörðurinn þolir ekki annað eins dráp. Fyrir utan að það verður gríðarlega dýrt að hreinsa og ef það verður ekki gert þá held ég að maður pakki bara saman. Mér líst mjög illa á þetta. Ég held að þetta verði til þess að svæðið verði óbyggilegt um einhvern tíma.“