Lars er ekkert fúll út í Aron

Aron Jóhannsson gaf ekki kost á sér í íslenska landsliðið sem mætir Slóveníu á Laugardalsvelli þann 7. júní næstkomandi. Aron hefur ekki gert upp hug sinn um hvort hann vilji spila fyrir Ísland eða Bandaríkin.

Landsliðsþjálfarinn Lars Lagerbäck kynnti í gær 22 manna landsliðshóp sinn fyrir leikinn mikilvæga gegn Slóvenum í undankeppni HM 2014. Ísland vann fyrri leikinn ytra, 1-2, og er í öðru sæti riðilsins. Það er því pressa á liðinu fyrir leikinn að standa sig vel.

Liðið verður án þeirra Gylfa Þórs Sigurðssonar og Jóhanns Bergs Guðmundssonar sem eru í leikbanni og Grétar Rafn Steinsson er meiddur. Aðalumræðuefnið á blaðamannafundinum í gær var Aron Jóhannsson, framherji AZ Alkmaar.

Aron er fæddur í Bandaríkjunum og getur því bæði spilað fyrir Ísland og Bandaríkin. Hann hefur ekki enn spilað A-landsleik og er því gjaldgengur í bæði landslið.

Lagerbäck sagði á blaðamannafundinum í gær að hann hefði rætt lengi við Aron, sem hefði ekki gefið kost á sér í hópinn. Leikmaðurinn hefur einfaldlega ekki gert upp hug sinn um hvort hann vilji spila fyrir Ísland eða Bandaríkin, sem hafa sýnt honum áhuga.

Svíinn segist ekki vera í neinni fýlu út í Aron þó svo að hann hafi ekki gefið kost á sér í liðið að þessu sinni. Hann hefði þó líklega valið Aron í hópinn ef hann hefði gefið kost á sér.

„Ég mun halda áfram að hafa samband við Aron. Síðast þegar ég talaði við hann fyrir um tveimur vikum vissi hann ekki að það væri ekki hægt að prófa að spila með öðru hvoru liðinu í æfingaleik. Ef hann spilar fyrir annað hvort liðið verður hann að gera það áfram,“ sagði Lagerbäck.

„Mitt mat er að það sé betra fyrir að hann að spila fyrir Ísland og ég mun koma þeirri skoðun minni áfram á framfæri við hann. Maður verður samt að bera virðingu fyrir fólki og þeim ákvörðunum sem það tekur. Ég fer ekki í neina fýlu þó að hann ákveði að spila fyrir Bandaríkin.“

Það eru tiltölulega kunnugleg nöfn í hópnum en Þórarinn Ingi Valdimarsson er reynsluminnsti maðurinn í honum með aðeins einn spilaðan landsleik. Enginn útileikmaður í Pepsi-deildinni er í hópnum og enginn úr deildinni kom til greina að þessu sinni.

„Það er alltaf auðvelt að velja svona 12-16 leikmenn í hópinn en svo vandast valið með síðustu mennina. Á maður að velja leikmenn sem eru lítið að spila en eru samt reyndir og sterkir leikmenn? Það erfiðaði líka valið að við erum án lykilmanns eins og Gylfa. Ég þurfti því að hugsa um hvernig væri best að velja í hópinn þar sem hann er ekki með. Það var því ýmislegt sem ég þurfti að hugsa um,“ sagði Lars og bætti við að það væri líka ákveðinn hausverkur að velja varnarmenn þar sem þar væru margir jafnir leikmenn.

Lagerbäck hefur iðulega þurft að gera breytingar á vörninni milli leikja en er hann búinn að gera það upp við sig hvaða fjórir leikmenn muni standa vaktina í leiknum gegn Slóvenum?

„Ég hef nokkuð góða hugmynd um það. Auðvitað skiptir samt máli hvernig menn munu standa sig á æfingum.“ Gengi liðsins í undankeppninni hefur verið gott og Lagerbäck fer ekkert leynt með að hann stefnir á að halda öðru sæti riðilsins og komast þar með í umspil um laust sæti á HM.

„Ég býst við því að fólk geri væntingar til okkar í þessum leik. Það er að mörgu leyti jákvætt að fá slíka pressu og að fólki sé ekki sama um liðið. Það þýðir að við erum að gera eitthvað gott. Á sama tíma þurfa leikmenn að gera sér grein fyrir því að við erum ekki orðnir neinir heimsmeistarar enn þá. Við verðum að halda áfram að leggja gríðarlega mikið á okkur. Ég býst við erfiðum leik gegn Slóvenum og ef við spilum ekki vel þá töpum við.“

Markmenn

Gunnleifur Gunnleifs., Breiðablik 24 landsleikir

Hannes Þór Halldórsson, KR 11

Ögmundur Kristinsson, Fram Nýliði

Varnarmenn                    

Birkir Már Sævarsson, SK Brann 34/0 mörk

Ragnar Sigurðsson FCK 26/0

Kári Árnason, Rotherham United 24/2

Sölvi Geir Ottesen Jónsson, FCK 21/0

Hjálmar Jónsson, IFK Gautaborg 21/0

Ari Freyr Skúlason, Sundsvall 10/0

Hallgrímur Jónasson, SønderjyskE 6/3

Miðjumenn                    

Emil Hallfreðsson, Hellas Verona 36/1

Aron Einar Gunnarsson, Cardiff 34/0

Helgi Valur Daníelsson, AIK 26/0

Rúrik Gíslason, FCK 21/1

Birkir Bjarnason, Pescara Calcio 19/2

Ólafur Ingi Skúlason, Zulte Waregem 17/1

Þórarinn I. Valdimarsson, Sarpsborg 1/0

Sóknarmenn                    

Eiður S. Guðjohnsen, Club Brugge 70/24

Gunnar H. Þorvaldsson, Norrköping 23/2

Arnór Smárason, Esbjerg 15/1

Kolbeinn Sigþórsson, Ajax 13/8

Alfreð Finnbogason,  Heerenveen 13/3