Tímamót í Tónskólanum

„Fyrsta veturinn vorum við bara að kenna forskólakennslu, inni í Seljakirkju og í safnaðarsalnum og þá hófst hið góða samstarf kirkjunnar og skólans sem stendur enn í dag,“ segir Edda Borg Ólafsdóttir, skólastjóri Tónskóla Eddu Borg. Bjarni Sveinbjörnsson, tónlistarmaður og eiginmaður Eddu, hefur verið hennar hægri hönd í skólaumsjóninni.

Það stendur mikið til í Tónskóla Eddu Borg því skólinn heldur upp á 25. starfsár sitt á skólaárinu en hann var stofnaður haustið 1989. Edda Borg var þá nýútskrifaður tónmenntakennari og kenndi tónmennt í Seljaskóla veturinn 1988-1989. Edda Borg segir að þá hafi hugmyndin að stofnun tónskólans kviknað, eftir að hafa séð þörfina fyrir tónlistarkennslu í hverfinu.

„Í upphafi var ég í öllu, allt frá því að kenna á píanó til þess að ræsta skólann en nú hefur þetta aðeins breyst,“ segir Edda Borg létt í lund. Fljótlega flutti skólinn úr kirkjunni yfir í Hólmasel 4-6 og bættist hljóðfærakennsla við. Skólinn var þar þangað til haustið 2009, þá á tuttugasta starfsárinu, en þá flutti skólinn í nýtt og glæsilegt húsnæði í Kleifarseli 18.

„Á fyrsta starfsári skólans voru nemendur um 70 talsins en núna nema um 150 nemendur við skólann,“ segir Edda Borg en nýja húsnæðið er virkilega glæsilegt og öll aðstaða til fyrirmyndar. „Píanóið hefur alltaf verið vinsælasta hljóðfærið en við kennum á flestöll hljóðfæri í dag en það eru sveiflur í vinsældum hljóðfæra á milli ára.“

Fram að þessu hefur skólinn sent nemendur frá sér þegar komið er áleiðis í náminu, en á undanförnum árum hefur hann í auknum mæli hafið samstarf við aðra tónlistarskóla svo unnt sé að bjóða nemendum upp allar þær aukagreinar og samspil sem þarf til að klára tónlistarnámið við skólann.

„Í tilefni afmælisins ætlum við að brjóta upp kennsluna á næstu önn og hafa opna viku fyrstu vikuna í mars. Sú vika endar svo með afmælistónleikum í 8. mars í Seljakirkju, þar sem við viljum sjá fyrrverandi, núverandi og tilvonandi nemendur,“ útskýrir Edda Borg. Tónleikar skólans hafa alla tíð verið haldnir í Seljakirkju og er samstarfið mjög gott.

„Skólinn er nú í fyrsta skipti að útskrifa nemanda af framhaldsstigi en Jónas Ásgeir Ásgeirsson harmóníkuleikari verður með burtfararprófstónleika í Hannesarholti föstudaginn 22.nóvember og erum við mjög stolt af honum,“ segir Edda Borg.

Hér að neðan má heyra og sjá tóndæmi af nýjustu plötu Eddu Borgar. Einnig er hér að neðan myndskeið af Jónasi Ásgeiri Ásgeirssyni harmóníkuleikara leika ljúfa tóna.