Vekja athygli á barnsmissi

„Þetta er í annað sinn sem við vekjum athygli á þessu málefni en í fyrra var eingöngu haldin bænastund. Nú verður hins vegar meira um að vera og við reynum að hafa andrúmsloftið örlítið léttara,“ segir Steinunn Björg Gunnarsdóttir, meðlimur í hóp sem stendur fyrir góðgerðartónleikum til styrktar bættri aðstöðu á sjúkrahúsinu og í kapellunni á Akranesi fyrir þá sem hafa misst börnin sín.

Hópurinn nefnir sig Englamömmur og er stuðningshópur. „Við erum nokkrar mömmur saman í hóp sem eigum þá hræðilegu reynslu sameiginlega að hafa misst börn,“ segir Steinunn Björg um hópinn sem kallar sig Englamömmur.

Tónleikarnir fara fram í Tónlistarskóla Akraness í kvöld klukkan 20. Hljómsveitin Ylja er á meðal þeirra listamanna sem fram koma á tónleikunum.

„Salurinn er ekkert svo stór þannig að þeir sem ekki komast fyrir eða hreinlega komast ekki á tónleikana en vilja samt styrkja málefnið geta lagt frjáls fjárframlög inn á reikninginn 552-14-401811 og kennitala er 110371-3309.

Einnig ætlum við að selja kertaklemmur sem ein Englamamman hannaði,“ segir Steinunn Björg að lokum.