Íslenski John Fogerty

„John Fogerty hefur verið svo afkastamikill og haft svo mikil áhrif á tónlistarsöguna,“ segir Sigurgeir Sigmundsson gítarleikari og meðlimur hljómsveitarinnar Gullfoss, sem kemur fram á heiðurstónleikum Creedence Cleawater Revival á Spot annað kvöld.

Creedence Clearwater Revival með John Fogerty í broddi fylkingar var ákaflega vinsæl hljómsveit á sjöunda og áttunda áratug síðustu aldar.

„Fogerty á svo mikið af lögum og mörg þeirra urðu líka þekkt með öðrum listamönnum eins og lagið Proud Mary í flutningi Tinu Turner.“

Sigurgeir og söngvari sveitarinnar Birgir Haraldsson hafa leikið tónlist Fogertys í fjölda ára. „Við spiluðum áttatíu tónleika árið 2000 með þessu efni,“ bætir Sigurgeir við. Einnig gáfu þeir félagar út tvær plötur með efni Johns Fogerty, árið 1999 og 2009.



Í Gullfoss eru einnig þeir Ingimundur Benjamín Óskarsson, Sigfús Óttarsson og Snorri Snorrason. Þetta eru fyrstu tónleikarnir sem haldnir eru á Spot eftir miklar breytingar. Miðasala er á Midi.is.