Ofát er ein af dauðasyndunum sjö

Lífið spurði Jóhannes Hauk Jóhannesson spjörunum úr og komst að því að það sé til siðs meðal frægra að heilsast á götum úti

Nafn: Jóhannes Haukur Jóhannesson.

ALDUR: 33 ára.

STARF: Leikari.

Hvern faðmaðir þú síðast?

"Börnin mín bæði samtímis." 

En kysstir?

"Annað barna minna, vil ekki segja hvort til að gera ekki upp á milli. Það verður allt brjálað ef maður gerir upp á milli. Ekki rugga bátnum."



Hver kom þér síðast á óvart og hvernig?

"Gói félagi minn. Við áttum góða dagsferð á Grundarfjörð um daginn og spjölluðum mikið í bílnum. Hann ljóstraði upp ýmsu um efnistök í Stundinni okkar sem hann stjórnar í vetur. Þetta er allt trúnaðarmál en hann kom mér skemmtilega á óvart með fyrirætlunum sínum."

Hvaða galla í eigin fari ertu búin að umbera allt of lengi?

"Ofát eða skammtastærðir. Þetta er ein af dauðasyndunum sjö og minn eini veikleiki. Það er nefnilega heldur ekkert gott að borða of mikið af góðum hitaeiningum. Hófsemi er eitthvað sem ég þrái að ná tökum á."

Ertu hörundsár?

"Minna með aldrinum. Held það sé þroskamerki. Ég reyni að leggja mig fram við að skilja hvað fólki gengur til með því sem það segir og gerir, það er ekki hollt að horfa alltaf á hlutina bara frá sínum bæjardyrum."

Dansarðu þegar enginn sér til?

"Já, mikið. Það er til að æfa mig fyrir það þegar fólk er að horfa.

Hvenær gerðirðu þig síðast að fífli og hvernig? Held að maður geri sig mest að fífli með dónaskap og vanvirðingu gagnvart öðrum. En ég vil síður tíunda mína mannlegu bresti á blaðsíðum fjölmiðla og fer því ekki nánar út í þá sálma." 

Hringirðu stundum í vælubílinn?

"Nei, ég veit að hann er mjög upptekinn annars staðar."

Tekurðu strætó?

Já, það kemur oft fyrir. Þá er gott að eiga strætómiða, því þeir eru mjög hagkvæmir.

Hvað eyðirðu miklum tíma á Facebook á dag? 5-10 mínútum, kannski.

Ferðu hjá þér þegar þú hittir fræga eða heilsarðu þeim?

"Ég heilsa þeim, enda landsfrægur maður sjálfur. Það er til siðs meðal frægra að heilsast á götum úti, þó svo við þekkjumst kannski ekki persónulega. Þetta hefur eitthvað með sameiginlega stöðu eða upplifun að gera. Svona eins og þegar maður stendur í röð, þá má maður eiga orðaskipti við aðra í röðinni."

Hvað ætlarðu alls ekki að gera um helgina?

"Ég ætla mér alls ekki á útihátíð. Enda allt of seint að pæla í því núna. Mér er nær."