Naglarnir á Litla-Hrauni pökkuðu inn nöglum

Fjáröflun fyrir nýjum línuhraðli til handa Landspítalanum hófst um síðustu helgi. Línuhraðlar eru sá tækjabúnaður sem notaður er við geislameðferð krabbameinssjúklinga.

Tveir slíkir eru á Landspítalanum en þeir eru komnir til ára sinna og því brýn þörf á einum nýjum að sögn Jóhannesar V. Reynissonar. Hann fer fyrir herferðinni, sem hann segir jafnframt átak til vitundarvakningar um blöðruhálskrabbamein. Fjáröflunin er í formi sölu barmmerkja með bláa naglanum.

„Nú ætla ég að herja á ferðamennina,“ segir Jóhannes. „Fyrir hvert barmmerki með bláa naglanum sem keypt er verður gróðursett eitt tré í Hekluskógum svo þetta er líka kjörið tækifæri fyrir þá að skilja eitthvað jákvætt eftir sig á Íslandi,“ segir hann.

Jóhannes segist hafa lent í vandræðum þegar kom að því að koma bláa naglanum í umbúðir. „Ég var búinn að gera ráð fyrir því að fá vernduðum vinnustað það verk en þegar til kastanna kom voru allir þar komnir í sumarfrí. Þá komu hins vegar naglarnir á Litla-Hrauni til skjalanna og tóku þetta að sér.“

Jóhannes biðlar nú til fólks sem getur lagt honum lið svo að barmmerkið með bláa naglanum verði sem víðast fyrir augum ferðamanna.