Valin í dómnefnd fyrir reynslubolta

Hrönn Sveinsdóttir, framkvæmdastjóri Bíó Paradísar, hefur verið valin í dómnefnd Europa Cinemas-verðlaunanna á Berlinale-kvikmyndahátíðinni. „Það er einstakur heiður að fá að vera með í dómnefndinni því að þetta er aðeins fyrir reynslubolta,“ segir Hrönn. „Þetta er flott viðurkenning á því sem við höfum verið að gera í Bíó Paradís, sem er fyrsta og eina listræna kvikmyndahúsið á Íslandi. Þeir hjá Europa Cinemas eru mjög impóneraðir yfir brautryðjandastarfi Bíó Paradísar hér á Íslandi. Þetta hefur mikla þýðingu fyrir tengslanet okkar í evrópskum kvikmyndaheimi.“

Á Berlinale-hátíðinni eru margir verðlaunaflokkar. „Í Europa Cinemas-verðlaununum er einn sigurvegari. Honum hlotnast Europa Cinemas-stimpillinn sem gefur stóraukna möguleika á dreifingu á þeirri mynd. Þessi stimpill er mikils virði.“

Dómnefndin er valin af stjórn Europa Cinemas-samtakanna. Í samtökunum eru um 1170 kvikmyndahús í 68 löndum. „Bíó Paradís hefur verið meðlimur í samtökunum síðan 2012. Ég var að koma af ráðstefnu í Grikklandi hjá þessum samtökum þar sem eftir því var tekið hvað við höfum unnið merkilegt starf miðað við hvað við erum í erfiðri stöðu. Við höfum til dæmis þurft að flytja inn myndir sjálf því fáar listrænar kvikmyndir eru fluttar hingað inn af öðrum.“

Hrönn veit ekki enn hverjir verða með henni í dómnefnd, en auk hennar verða tveir aðrir í dómnefndinni. „Ég er rosalega spennt. Hún verður örugglega skipað einhverjum helstu bíósérfræðingum Evrópu svo ég get ekki beðið. Mér finnst Berlínarhátíðin vera langskemmtilegust af þessum stóru hátíðum. Þar sér maður langáhugaverðustu myndirnar. Við munum að sjálfsögðu færa rjómann af þessum myndum til Íslands svo áhorfendur hérna fái notið þess besta sem heimurinn hefur upp á að bjóða í kvikmyndagerð.“