Lampard verður áfram hjá Chelsea

Chelsea hefur staðfest að Frank Lampard verði áfram hjá félaginu en hann hefur skrifað undir nýjan eins árs samning.

Þetta verður hans þrettánda tímabil hjá Chelsea en fyrr í vetur var greint frá því að Lampard yrði líklega ekki áfram, eftir að samningaviðræður sigldu í strand.

En þráðurinn var tekinn upp að nýju og hafa viðræður borið árangur. Lampard varð á dögunum markahæsti leikmaður í sögu félagsins þegar hann skoraði tvö mörk í sigri á Aston Villa. Hann er nú kominn með 203 mörk alls.

Í gær varð hann svo Evrópumeistari með Chelsea annað árið í röð er liðið vann Benfica í úrslitaleik Evrópudeildar UEFA.

Hann hefur spilað alls 607 leiki með Chelsea og er í hópi aðeins þriggja leikmanna sem hefur náð að spila meira en 600 leiki í bláu treyjunni.