Stóra-Seli úthlutað að íbúum forspurðum

Sjálfboðaliðasamtökin Veraldarvinir hafa fengið íbúðarhúsinu Stóra-Seli við Holtsgötu 41b úthlutað frá Reykjavíkurborg án endurgjalds fyrstu árin gegn því að sjálfboðaliðar geri upp húsið.

Borgarfulltrúar Sjálfstæðisflokksins lögðust gegn tillögu um að leigja Veraldarvinum húsið. Kjartan Magnússon, borgarfulltrúi Sjálfstæðisflokksins gagnrýnir að ekkert samráð hafi verið haft við íbúa húsa í nágrenninu áður en sjálfboðaliðasamtökunum hafi verið úthlutað húsinu. „Við vonuðumst til að það yrði haft samráð við íbúa um hvaða starfsemi væri í húsinu. Þessi meirihluti sem kennir sig við samráð við íbúa vildi náttúrulega ekki gera það,“ segir Kjartan.

Húsið við Holtsgötu 41b var byggt árið 1866 og stendur nú umlukið fjölbýlishúsum. Húsið er friðað. Það var áður í eigu einstaklings sem vanrækti viðhald þess og er ástand þess sagt afar slæmt.

Kjartan hefur áhyggjur af því að samtökunum farist viðhald hússins ekki nægilega vel úr hendi. „Þessi bær er reistur á þar síðustu öld og það má velta því fyrir sér út frá faglegum sjónarmiðum hvort það sé sniðugt að fela viðhald á þessu húsi samtökum sem eru eflaust ágæt en hafa að mér vitandi enga sérþekkingu á viðhaldi á svo gömlu húsi.“

Veraldarvinir þurfa ekki að greiða leigu af húsnæðinu fyrstu þrjú árin gegn því að samtökin geri upp húsið. Húsið verður notað sem gistipláss fyrir sjálfboðaliða á vegum Veraldarvina, sem tekur á móti rúmlega 1.600 sjálfboðaliðum ár hvert.

„Allar framkvæmdir verða kynntar Reykjavíkurborg áður en í þær verður ráðist,“ segir Þórarinn Ívarsson, framkvæmdastjóri félagasamtakanna Vildarvina. Hann segir að erlendir sjálfboðaliðar muni annast endurbæturnar undir leiðsögn húsasmíðameistara.

Dagur B. Eggertsson, formaður borgarráðs, gefur lítið fyrir gagnrýni Kjartans. „Það er engin spurning að það þarf að færa húsið til upprunalegs horfs og tryggja að það sé ekki beinlínis hættulegt. Það hefði verið mikil sýndarmennska að fara í samráð með það,“ segir Dagur.

„Okkur fannst spennandi að gera bragarbót á húsinu í samstarfi við Veraldarvini,“ bætir hann við. Hann treystir félaginu fyllilega til að sjá um endurbætur á húsinu. „Já, en við viljum að það verði allt undir eftirliti Minjastofnunar,“ segir Dagur.